2 жылда Достық-Мойынты телімінде 870 шақырымдық екінші жол салынбақ
«Қазақстан теміржолшысы» газетінің тілшісі
«Қазақстан темір жолы» ұлттық компаниясы мемлекетіміздің 2025 жылға дейінгі аралықты қамтитын «Қуатты аймақтар – еліміздің даму драйвері» атты ұлттық жобасы шеңберінде ұзындығы 870 шақырымдық Достық-Мойынты телімінде екінші жолды салуды жоспарлап отыр.
Жоба 2022-2024 жылдар аралығында жүзеге асырылып, оның барысында 31 станция қайта құрылымдаудан өтеді деп жоспарлануда. Демек, биыл аталған телімде екінші жолдар құрылысы басталады.
Құрылыстың негізгі мақсаты – болжамды тасымал көлемін есепке ала отырып, резервтік қуаттылығын қамтамасыз ету арқылы Мойынты-Достық-Алашанькоу телімдерінің транзиттік өткізу және өңдеу қабілеттілігін арттыру, сондай-ақ, транзиттік контейнерлік пойыздардың жылдамдығын тәулігіне 1500 километрге дейін ұлғайту болмақ. Құрылыс біткеннен соң Достық-Мойынты телімін электрлендіру көзделуде екен. Ал жобаны Қазақстан Республикасы Ұлттық қорының қаражаты есебінен қаржыландыру қарастырылуда.
Қазіргі кезде жалпы ұзындығы 14 шақырымды құрайтын Саяқ-Балқаш, Тағынқара-Ащыөзек, Ащыөзек-Ақжайдақ, Балқаш-Көкдомбақ телімдері құрылысының бірінші кезеңінің жобалық-сметалық құжаттамасын әзірлеу бойынша келісімшарт қол қойылуға жіберілген екен.
Сөз орайы келгенде, Қытайда 2021 жылы Цзинхэ-Алашанькоу шекаралық учаскесінде электрлендірілген екінші жолдардың құрылысы басталғанын айтар едік. Бұл өз кезегінде, «Достық-Мойынты» жобасының уақытылы жүзеге асырылып, Қазақстан-Қытай шекарасындағы теміржол инфрақұрылымының қатар дамып жатқанын көрсетеді.