Атырау-Астрахан автожолының құрылысына қиыршық тас жеткізу мәселесі пысықталды
«Қазақстан теміржолшысы» газетінің тілшісі
Атырау қаласында құрылыс материалдарын жаз маусымында теміржолмен тасымалдауды қамтамасыз ету бойынша кеңес өтті, деп хабарлайды Rail-news.kz
Бұл өңірде халықаралық Атырау-Астрахань тас жолының қайта жаңартудан өтіп жатқанына екі жылдың жүзі болып қалды. Биыл тағы жалғасатын жол жұмысына қажетті қиыршық тас теміржол көлігімен тасымалданбақ.
Бұл туралы «Қазақстан темір жолы» ҰК» АҚ, әкімшілік өкілдері, сондай-ақ, Батыс өңірінің жүк жөнелтушілері мен жүк алушылары қатысқан жиында белгілі болды.
Жиында «ҚТЖ» ҰК» АҚ инертті жүктерді тасымалдауды ерекше бақылауда ұстап отырғаны сөз болды. 2022 жылғы наурызда еліміздің магистралі арқылы 1 млн тонна құрылыс жүгі тасымалданып, оның көлемі өткен жылдың сәйкес кезеңіндегі көрсеткіштен 20%-ға асып түскен. Құрылыс материалдарын тиеу құрылымындағы негізгі үлесті қиыршық тас алып отыр. Жалпы, үстіміздегі жылдың бірінші тоқсанында құрылыс жүктерін тиеу 4%-ға, яғни 2,3 млн тоннаға дейін өскен. Құрылыс материалдарының негізгі көлемі елдің ішкі нарығының тұтынушыларына тиесілі болып отыр.
Кеңесте қиыршық тастың жоспарланған көлемінің тасымалын орындау, «Қазтеміртранс» АҚ вагон паркін ұтымды пайдалану, жүктерді тасымалдаудың технологиялық және техникалық процестері сияқты мәселелер талқыланды.
Кеңеске қатысушылар мұндай форматтағы кездесулер өзекті мәселелерді жедел шешуге көмектесетінін атап өтті. Олар құрылыс жүктерін тиімді тасымалдауға дайын екендіктерін білдірді.