Жаңа технологиялар Атыраудағы жұмыс тиімділігін артырды

Атырау магистральдық желі бөлімшесі өндіріске жаңа технологияларды енгізуді жалғастырып келеді. Бөлімше басшысының орынбасары Ж.Жөнтұрбаевтың айтуынша, Маңғыстау-Бейнеу-Оазис-Мақат-Атырау-Ақсарай учаскелерінде диспетчерлік орталықтандыру түбегейлі жаңартылды.

Диспетчерлік орталықтандыру қондырғысы 1196 шақырымды құрайтын жолда орнатылған. Мұнда байланыс бұрынғыдан әлдеқайда жақсарып, еңбек үдерісінің жылдамдатылуына жағымды ықпал еткен. Талшықты-оптикалық байланыс желісі (ВОЛС) кабелі жүргізіліп, байланыс жақсарды. Ақпарат беру жеделділігі әлдеқайда артты, әсіресе, мәліметтер беру желісі жылдам. Сондай-ақ, барлық аймақ бойынша DX-500 арқылы телефон байланысы орнатылған. Ол арқылы халықаралық сөйлесулер коммутатордың қосуынсыз немесе «8» байланыс нөмірінсіз-ақ мүмкін болды, яғни сөйлесулер жедел әрі тегін. Ресейдің Астрахань қаласымен шектесетін Ақсарай-2 мемлекетаралық түйіспе пунктінде Қазақстан бойынша экспедиторлардан транзиттік төлемдерді уақытылы алу мақсатында жүк кассирлері мен пойыз қабылдаушыларға арнап автоматтандырылған қосымша жұмыс орындары өз қызметін бастады. Бұл шекарада еңбек ететін қазақстандық теміржолшылар үшін жүйелі жұмыс тәсілі болып табылады.

Сонымен қатар, Бәйтерек және Бекбике станциялары бойынша да пойыздар және вагондармен атқарылған жұмыстардың мәліметтерін ақпараттық жүйеге мерзімінде өткізу мақсатында станция кезекшісіне арнап қосымша автоматтандырылған жұмыс орындары құрылды. Бұрын қанша вагонның келіп-кеткені, станция жұмысына қатысты басқа да мәселелер телефон байланысы арқылы алынса, ендігі жерде барлық ақпарат автоматты түрде компьютерде көрініп тұрады. 

Сағыз станциясынан Ганюшкино станциясына дейінгі жол телімі ВОЛС желісіне қосылып, мұнда да ақпаратты ауқымды көлемде және шұғыл беруге жағдай жасалды. Белгі беру және байланыс шаруашылығы бойынша бірқатар учаскелерде қозғалыс қауіпсіздігін қамтамасыз ету үшін жүріп бара жатқан қозғалмалы құрамның техникалық жағдайына автоматты бақылау жасайтын құрылғы (КТСМ) іске қосылды. Атап айтқанда, Құлсары және Атырау дистанцияларында Мақат-Құлсары учаскесі бойынша Бекбике разъезінде, Құлсары-Бейнеу учаскесінде Қоркөл станциясында, Атырау-Ақсарай учаскесі бойынша Тұманды мен Д.Нұрпейісова бекеттерінде 7 дана контейнерлік типтегі жаңартылған модульді техникалық құралдар кешені орнатылған. Мақат, Ақжайық станцияларында «Модернизация ЛАЗ» жобасы аясында желілік-аппаратты залдарда каналдарды нығыздаудың жаңа буынды қолжетімді, заманауи интеллектуалды мултисервистік концентраторға модернизациялау жүзеге асырылды. Міне, жаңа технологиялардың өндіріске енгізілуі еңбек үдерісін арттырып қана қойған жоқ, уақытты үнемдеп, ең бастысы жеделдік пен жылдамдықты қамтамасыз етті.