Қорайлы станциясында көпір салынады
Ақтөбе облысы бойынша меншікті тілші
Халық тығыз орналасқан станцияға аспалы көпір ауадай қажет. Ақтөбенің Қорайлы станциясында жаяу жүргіншілерге арналған көпір салу ұсынысы жергілікті биліктен қолдау тапты.
Батыс аймақтық магистральдық желі бөлімшесінің мамандары жергілікті билікке Қорайлы станциясына аспалы көпір салу қажеттігі туралы бірнеше жылдан бері айтып келеді. Теміржол бойында арнайы өткелдің болмауынан тұрғындар балабақшаға, мектепке, ауруханаға, дүкендерге, дәріханаларға бару үшін темір жолды кесіп өтеді. Тоқтап тұрған вагон астынан өту жағдайлары да тіркелген.
«Ақтөбе теміржолының аумағында қауіпсіздікті күшейтуге және пойыз қозғалысына кедергі келтірмес үшін тағы бірнеше көпір керек. Көлік қатынасы қалың Жилгородок ауданы мен Алға станциясының 1832 шақырымы мен Ақтөбе ауданының 1024 шақырымына, Жазық станциясының 130 шақырымына автокөлік көпірі керек. Ал, пойыздарды шұғыл тоқтату жағдайы жиі тіркелетін Жіңішке және Ақтөбе-1, Ақтөбе-2 өткелдеріне жолаушылар көпірін салу мәселесі сұранып тұр», – дейді «Қазақстан темір жолы» ҰК» АҚ Ақтөбе магистральдық желі филиалының бас инженері Сәндібек Аманбаев.
Ақтөбе қалалық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы биыл жобалық-сметалық құжаттама әзірлеу қолға алынатынын хабарлады. Ал көпір құрылысы келесі жылы басталады.
Желілік полиция бөлімінің мәліметінше, жыл басынан бері Ақтөбенің үш тұрғыны темір жолды кесіп өту кезінде қаза тапқан. Сондай-ақ, тәртіп сақшылары пойыздарды авариялық тежеу бойынша 34 оқиғаны тіркеді. Теміржол бойында қауіпсіздік ережесін сақтамаған 700 адам әкімшілік жауапкершілікке тартылған.