Нұр-Сұлтан-1 станциясында жол өтпесі керек
«Қазақстан теміржолшысы» газетінің тілшісі
Нұр-Сұлтан-1 станциясының басшылығы елорда әкімдігінен қаланың шет жағындағы автомобиль жолы мен темір жол түйісетін тұстан жол өтпесін салуды сұрайды. Бұл – қаланың Өндіріс тұрғын алабы ауданы (бұрынғы атауы Лесозавод). Сонымен қатар сол жерде автомобиль көпірін, автомобиль көлігінің жолайрығын салу қажеттілігі де айтылған.
Станция басшылығының ұсынысы қанағаттандырылса, аталған тұста автомобиль және қоғамдық көлік ағынын ұлғайтуға мүмкіндік туады, теміржолмен әрі-бері өтетін жергілікті тұрғындардың қауіпсіздігі қамтамасыз етіліп, өткелде жол-көлік оқиғалары азаяды.
Ал қазіргі жағдайда Атбасар және Көкшетау станциялары бағытында маневрлік жұмыстар жүргізгенде және жүк пен жолаушы пойыздарының қозғалысы барысында жұмыс көлемінің ауқымдылығына байланысты станцияның жұп паркінде, яғни локомотив депосынан Өндіріс тұрғын алабына дейінгі аралықта құрамдар жолда ұзақ уақыт тұрып қалады. Осыған байланысты жергілікті тұрғындардың денсаулығы мен өміріне қауіп төніп, олар жолдан өту үшін вагондар астына түсіп жатады.
Бүгінде мұнда екі жаяу жүргінші көпірі бар, бірі вокзал аумағында, екіншісі Аспара көшесінің басында орналасқан. Станцияда жолды кесіп өту ережелерін сақтау керектігі туралы ұдайы хабарланып тұрады. Машинистер қайғылы жағдайлардың алдын алу үшін шұғыл тежегіштерді қолданады.
Теміржолшылар өтінішіне елордалық Көлік және жол-көлік инфрақұрылымын дамыту басқармасы шағын айналма жолдың төртінші учаскесі құрылысының жобалық-сметалық құжаттамасы әзірленуде деп жауап берді. Бұл жобаны іске асыру Өндіріс тұрғын алабы ауданында теміржол өткеліндегі кептелістер мәселесін шешуге мүмкіндік береді. Алайда құрылысты тек 2023 жылдан кейін жүргізу жоспарланған, ал қаржыландыру жер учаскесі толық босатылған жағдайда ғана бөлінеді.