Биыл қармен күреске 284 қар тазалағыш техника жұмылдырылмақ

Иә, қылышын сүйретіп қыс келді. Қарашаның соңына қарай республиканың солтүстік және шығыс аудандары мен орталығында қар жауып, бұрқасын соғып, қатты аяздар басталды. Ал қыстың алғашқы айы желтоқсанның келуімен оңтүстік аймақтарда да қар түсіп, күн күрт суытты. «Қыс шанасын жаз сайлап» үйренген теміржолшылардың биылғы қысқа қамданысы қалай?

Биыл қармен күреске Магистральдық желі дирекциясы бойынша 284 қар тазалағыш техника жұмылдырылмақ. Бүгінде оның 90%-ы тұрақты жұмыс істеуге сақадай сай тұрса, деполық және күрделі жөндеуден өткізуге 68 арнайы жылжымалы құрам кіргізілген. Бүгінге дейін 50-ден астам техника жөндеуден өткен.  

«ҚТЖ-Жүк тасымалы» ЖШС локомотивтер мен вагондардың қыс маусымына әзірлігіне биыл да ерте қам жасаған. Соның арқасында бүгінде межеленген 1370 локомотив қысқы режимге толық көшірілген. Жалпы, ұлттық компания бойынша биылғы қатал маусымға 1354 бірлік жолаушылар вагоны мен электропойызын қысқы режимге көшіру жоспарланған. Нақтысында 1276 бірлік жылжымалы құрам толықтай әзірліктен өткен. Сонымен қатар байланыс желілерінде мұздың қатуын болдырмау үшін 19 вибропантограф дайындалса, ЭСО, ФРЭС роторлық машиналарына тартымдық қызмет көрсету үшін 22 локомотив сынақтан өткен.  

Ұлттық компанияның филиалдары мен еншілес ұйымдары 2022-2023 жылдардың қыс маусымына дайындық барысында 231 іс-шараны орындауды жоспарлаған. Бүгінде бұл шаралардың 90 пайыздан астамы жүзеге асырылған. Сондай-ақ, биыл қыс маусымына 461 қазандық пен 84 жылу трассасы және төрт мыңға жуық ғимарат пен жасанды құрылыстар дайындықтан өткен. Қазір олар қалтқысыз қызмет етіп тұр.  

Компанияның желілік бөлімшелерінде «алғашқы қыстаушылар» мәселесіне де айрықша көңіл бөліп, олар арнайы оқытылып, тәжірибелі мамандарға бекітіледі. Осы ретте, атап өтерлігі, қолданыстағы Ұжымдық шартқа сәйкес тәлімгер теміржолшыларға еңбекақының тарифтік мөлшерлемесінің 20% мөлшерінде қосымша ақы төленеді. Биылғы жылы Компания бойынша барлығы 5822 адам алғашқы қысын қарсы алмақ, олар қыс маусымында жұмыс істеудің қыр-сырына қанығып, тиісті емтиханнан өткен.  

Желтоқсан айында-ақ қыса бастаған «кәрі құда» кәріне мінсе, қосымша резервтер іске қосылады. Демек, алдағы қысқа теміржолшылар сақадай сай деген сөз.