Отандық ұзын өлшемді рельстер жол жөндеуге пайдаланылады

Отандық өндірістің 120 метрлік рельстер партиясы «ҚТЖ» ҰК» АҚ – «Луговой рельс дәнекерлеу кәсіпорны» филиалына жеткізілді, деп хабарлайды Rail-news.kz.

Мұндай ұзындықтағы рельстер алғаш рет Ақтөбе рельс арқалық зауытынан (АРАЗ) жөнелтілді. Оларды тасымалдау үшін қазақстандық өндірістің арнайы ұзын өлшемді жылжымалы құрамы сатып алынды. Бұған дейін зауыттан «ҚТЖ» ҰК» АҚ-ға ұзындығы 100 метрлік рельстер Ресей Федерациясынан жалға алынған 100 метрлік рельстасушымен тасымалданған болатын.

Кәсіпорында ұзын өлшемді рельстер 800 метрлік тарамдар дәнекерленіп, жолды күрделі жөндеуге қолданылады. Жол құрылымында түйіспелердің аз болуы жолаушылар пойыздары қозғалысының жайлы, ал жүк пойыздары қозғалысының жылдамдығының жоғарылығы қамтамасыз етіледі. ҚТЖ желісіне түйіспесіз жолды төсеу арнайы «Robel» машинасының көмегімен жүргізіледі.  

Жыл сайын «ҚТЖ» ҰК» АҚ мен «АРБЗ» ЖШС арасындағы ұзақ мерзімді шарт шеңберінде магистральдық теміржол желісін жаңғырту үшін 80 мың тоннаға жуық рельсті өнім жеткізіледі.