Жылу жүйелері күнделікті бақылауда
Қызылорда облысы бойынша меншікті тілші
«Қыс шанасын жаз сайлаған» Теміржолсу-Қызылорда мекемесінің теміржолшылары жылу маусымы басталғанда тұтынушылар сұранысына қарай қазандықтарын қосып, жылу тарата бастады.
Жылу таратылған сәттен бастап мекеме мамандары жылу жүйелерін күнделікті бақылап отырады. Пештерден және қазандықтардың шығу нүктесінен 55-60 гига калорий шамасында берілетін жылу температурасы қолданушыға дейінгі аралықта айтарлық өзгере қоймайды. Себебі оған дейінгі аралықтағы жылу жүйелері суықтан қорғалатындай етіп жылу сақтау орамаларымен қапталған. Осылайша жылу көзінен шыққан температура қолданушыға дейін өз қалпын сақтап, оның жұмыс бөлмесіне қажетті 18 градустық температураны тұрақты беріп тұрады. Мәселен, Шиелі станциясындағы жылу қазандығынан 15 күн ішінде тәулігіне 54,269 гкал жылу қуаты таратылды. Бұл дегеніміз орташа есеппен әр тұтынушыға 3,617 гкал жылу қуаты таратылған.
– Қазіргі таңда жылу қазандықтарынан тұтынушыға таратылуы тиіс керекті жылу тұрақты беріліп тұр. Жылу беру мәселесіне қатысты тұтынушылардың арыз-шағымы болған жоқ. Бұған дейін тұтынушыларға аймақтағы 8 қазандықтан жылу таратып келдік. Биыл мекемелер арасындағы келісімге байланысты Жаңақорған, Шиелі, Белкөл және Тереңөзек станцияларындағы көгілдір отынмен жылытылатын жылу қазандықтарынан жылу қуаты таратылатын болды. Қазандықтар жылу маусымы үшін тиянақты дайындықтан өткізілді, – дейді Теміржолсу-Қызылорда филиалының бастығы Насыр Абдуллаұлы.
Теміржолсу-Қызылорда мекемесіне бір жылдық жылу маусымына керекті 220 тонна көлеміндегі көмір қоры 17 қыспақты су мұнарасы орналасқан бекеттерге жеткізілген. Жылу қазандықтары көгілдір отынмен жылытылса, су мұнараларындағы пештер Шұбаркөл кенішінен әкелінген көмірмен жылытылады. Аймақтағы біршама мекемелердің жұмыс орындарын автономды жылыту көздеріне ауыстыруына байланысты Жалағаш, Жосалы және Төретам станцияларындағы жылу қазандықтары консервацияға жіберіліпті.