Қазақстанда теміржолды жоспарлы жөндеу жұмыстары басталды
"ҚТЖ" ҰК" АҚ желісінде жыл сайынғы маусымдық жөндеу-жол жұмыстары басталды, деп хабарлайды Rail-news.kz. Биыл жөндеудің барлық түрімен 1480 шақырым теміржол төсемі жаңғыртылады. Оның ішінде 512,7 шақырымы түгелімен жаңартылады.
Еліміздің барлық өңірлерінде жол жөндеу кестеге сәйкес жүргізіледі. Бүгін, 17 наурызда күрделі сипаттағы жұмыстар Алматы, Жамбыл жол бөлімшелерінің шекараларында Шілбастау – Қопа, Шолдала – Құмшағал – Тараз учаскелерінде басталды. 19 наурызда Маңғыстау магистральдық желі бөлімшесінің Сай-Өтес – 7 Рзд аралығында жөндеуді бастау жоспарлануда. Бір аптадан кейін атыраулық теміржолшылар 4 Рзд.– 5Рзд. – Ганюшкино учаскесіндегі инфрақұрылымды жаңартуды бастайды.
Күрделі жаңартудан басқа, теміржолшылар жолды күшейтілген орташа және орташа жөндеуді орындайды. Бағыттамалық бұрмалар ауыстырылады. Рельс тіректері, рельс жолтабаны ауыстырылады және т.б. іс-шаралар орындалады. Жол жұмыстары арнайы техниканың (Duomatic, Unimat MF, түзету-ұру-тегістеу машиналары, рельсті тегістеу пойыздары және т.б.) көмегімен жүргізіледі.
Пойыздар қозғалысының қауіпсіздігін арттыру үшін инфрақұрылымды жаңарту жүргізілуде. Жүк тасымалының өсіп келе жатқан көлемі магистральдық желіге елеулі жүктеме туғызады. ҚР Президентінің 2029 жылға дейін ҚТЖ теміржол инфрақұрылымын жаңғырту бойынша қойған міндеттерін орындау аясында 11 мың шақырым темір жолы жөнделеді. Бүгінгі күні жоспарланған көлемнен 2800 шақырымнан астам темір жол жаңғыртылды (2023 жылы – 1443 км; 2024 жылы – 1430 км).