Атырау темір жолында инфрақұрылым жаңарып жатыр

Атырау темір жолында инфрақұрылымды сауықтыру, электр және байланыс саласын модернизациялау, жолдар мен станциялардың жағдайын жақсарту бағытында өткен жылы ауыз толтырып айтарлықтай жұмыстар жасалды.

Атырау магистральдық желі бөлішесі бастығының өндіріс жөніндегі орынбасары Аманқос Жылқыбаевтың айтуынша, өткен жыл соңында тозығы жеткен автобұғаттау әуе желісі сымдарын кабельге алмастыру үшін траншея дайындау жұмыстары жүргізіліп, соның ішінде Доссор-рзд 414 аралығында 10,1 км, рзд.11-Исатай аралығында 15 км, рзд. 16-Туманный аралығында 12 км кабель ауыстырылды. Сондай-ақ тозығы жеткен 31 дана электропривод жаңартылды.  

Инфрақұрылымды жақсарту, байланыс саласын модернизациялау бойынша Атырау, Ақжайық сигнализация және байланыс дистанцияларында Атырау, Махамбет, Мақат станцияларындағы Электрлік орталықтандыру кешенінде қызмет ету мерзімі өткен қуат панельдерін ауыстыру жұмыстары, сондай-ақ Бейнеу, Исатай станцияларында вокзал ғимаратына күрделі жөндеу жұмыстарының жүргізілуіне байланысты вокзал ішінде орналасқан Электрлік орталықтандыру кешенін жаңа ғимаратқа көшіру жұмыстары жүргізілді. Бұл – өте ауқымды жұмыс.

Ал Атырау электрмен жабдықтау дистанциясы бойынша 60 дана темірбетонды бағана, 560 дана траверс, ПСО типті 45 км әуе желі сымдары АС-35-ке, 500 дана изолятор, 7 км АС сымын СИП-4-ке, 6 дана трансформатор, 3 дана КТП КТПН-ға ауыстыру жұмыстары атқарылды. Сонымен қатар Атырау, Ақжайық, Құлсары сигнализация және байланыс дистанцияларында пойыздар қозғалысы қауіпсіздігін сақтау мақсатында электр жетектер, релелік шкафтар, әуе желісі еңістер мен аккумуляторлар ауыстыру жұмыстары жүргізілді.  

– Теміржол учаскелеріндегі жол құрылымдары, стрелкалар және байланыс-бақылау құрылғылары тексеріліп, анықталған ақаулар уақытылы жойылды. Қауіпсіздік талаптарының орындалуын бақылау мақсатында тәуліктік кезекшілік пен мониторинг күшейтілді. Жалпы, бөлімшеде қауіпсіздікті бұзу мен төтенше жағдайлар орын алған жоқ. Жол өлшеуіш вагонның қорытындысы бойынша балдық бағам өткен жылы жоғары деңгейде болды, – дейді А.Жылқыбаев.