Күрделі жөндеуді межелеп қалды

Қозғалыс қауіпсіздігін сақтау, станциялардың өткізу қабілетін, пойыздар жүрісінің жылдамдығын арттыру үшін жол сапасы жақсы болуы маңызды. Соған сәйкес өңірде әлі де болса жаңартатын жолдар бар. Атырау магистральдық желі бойынша биыл 29,732 км жолды күрделі жөндеуден өткізу жоспарланған.

Бүгінде Құлсары жол дистанциясына қарасты Құлсары-Бейнеу учаскесінде, рзд. Майкөмген-рзд467-рзд468 аралығында жолды күрделі жөндеу жұмыстары жүргізіліп, қазіргі уақытта негізгі төсемдер төселді. Бұл – биылғы жылғы алғашқы күрделі жөндеу жұмыстары. Аталған учаскелер бойынша 6 сағаттық «толаскез» алынып, жұмыстар жалғасып жатыр. Мердігер компания осы айдың аяғына дейін бітіруді межелеп отыр.  

– Күрделі жөндеу жұмыстары барысында жолдың ескі темір жолы түгел алынып, орнына су жаңа темірбетонды шпалдар, барлық технологиялық талаптар сақталып, салынып жатыр. Бұрынғы рельстердің ұзындығы 25 метрлік болып бунақталып салынатын болса, қазіргі уақытта түйіспесіз жолдар салынуда, – дейді Атырау магистральдық желі бөлімшесі директорының бірінші орынбасары Аманқос Жылқышиев.  

Сондай-ақ 9,2 км жолды орташа жөндеуден өткізу, 20 дана бұрмаларды ауыстыру және 74,6 км жол бойында малдың шығуына қарсы қоршау тұрғызу жұмыстары қоса жүргізілуде. Жолға мал шығып кету мәселесі теміржолшылар үшін қашан да өзекті болып келеді, өйткені мал басудан көп шығын келуде. Сол секілді, жол дистанцияларында шешілмей келе жатқан мәселелер де жоқ емес. Мәселен, 2011 жылдан бері жолдың күрделі жөндеу жұмыстары барысында шпалдар «Фоссло» типті бекітпелермен орнатылып келеді. Аталған бекітпелер элементтерінің ескіруіне орай қазіргі уақытта «Фоссло» материалының рельсасты аралық төсемдеріне үлкен қажеттілік туындап отыр.  

Сондай-ақ соңғы жылдары мекемеде алынған кіші механизациялар, яғни порталды көтергіш кран, жол домкраты, рихтовщик, АБ-2 электростанциясы, ЭШП ұлтандау, рельсжонғыш, рельскескіш, рельстескіш станоктар, шурупогайковерт, гидравликалық кергіш, бір рельсті арба, т.б. құрал-саймандардың мерзімінен бұрын істен шығуы орын алуда. Апатты жағдайларда қиын учаскелерге бара алатын жол талғамайтын арнайы көліктер де қажет. Осы керек-жарақ түгенделсе, дистанциялар жұмысы жандана түсері сөзсіз.