150 мың тоннаға жуық өнім өндірген
«Ақтөбе рельс-арқалық зауыты» кәсіпорнында әлеуметтік міндеттемелер мен мекемедегі өндірістік бағдарламалардың орындалу барысына есеп берілді.
Ақтөбе рельс-арқалық зауыты – еліміздегі үдемелі индустриялы-инновациялық даму мемлекеттік бағдарламасы аясында құрылған кәсіпорын. Зауыт қызметінің негізгі бағыты – жоғары жылдамдықты теміржол магистральдарын салуға арналған рельстер шығару. Компания әлемдік стандарттарға сай келетін жоғары сапалы өніммен ішкі нарықты қамтамасыз етумен шектелмей, өнімін сыртқы нарыққа да шығара бастағаны белгілі.
«Біздің зауыттан өндірілген рельстер елімізден бөлек, алыс-жақын шетелдерге шығарылып келеді. Өткен жылы рельс-арқалық зауытқа 47,5 миллиард теңге жалпы көлемі 170 819 тонна өнім өндіру міндеті қойылды. Міндет 87,2 пайызға орындалды. Яғни, былтыр 149 020 тонна өнім өндірілді », – деп ақпар берген Ақтөбе рельс-арқалық зауытының басшысы Валерий Обилец жоспарлы міндеттің толық орындалмауын өндірістегі баламалы жеткізушінің ауысуымен түсіндірді.
Бүгінгі күні рельс-арқалық зауытында 794 адам жұмыс жасайды. Жұмысшылар әлеуметтік кепілдіктермен қамтамасыз етілген, кадр тұрақсыздығы жоқ, еңбекақы уақытында төленеді.
Ардақ САТТАРҚЫЗЫ, Ақтөбе