Құрықтың қуаттылығы артып келеді
Теміржол және автомобиль құрамдас бөлігі бар қазіргі заманғы инфрақұрылымдық объектілермен жабдықталған Құрық порты өткен жылды жақсы көрсеткіштермен қорытындылап, биылға жаңа жоспар түзді.
Кешеннің іске қосылуы Транскаспий халықаралық көлік бағытына үлкен серпін бергені анық. Теңізге шығатын жолы жоқ елдер қатарында болған Қазақстан бір ғана Каспий арқылы екі бірдей айлық құрып, жұмысын жолға қоя білудің нәтижесінде бүгінгі таңда Қазақстан порттарының жалпы қуаттылығы жылына 26 млн тоннаға жеткен.
Құрық порты арқылы Қытайдан Түркияға Баку-Ахалкалаки-Карс жаңа жолын пайдалану арқылы транзиттік жүктер белсенді түрде тиелуде. Қазақстандық экспорттық жүктер де жөнелтілуде. Дәнді дақылдар арнайы контейнерлерде Құрық портынан Каспий арқылы Әзербайжан және Грузия, Түркияға тасымалданады. Жүктердің негізгі номенклатурасы: контейнерлік жүктер, мұнай өнімдері, түрлі халық тұтынатын тауарлар, астық, құрылыс жүктері, өнеркәсіптік жабдықтар, азық-түлік өнімдері, құбырлар, доңғалақты техника, химиялық, т.б жүктер.
2018 жылғы қаңтар-желтоқсан аралығында Құрық паром кешені арқылы жүктерді ауыстырып тиеу шамамен 2 млн тоннаны, оның ішінде темір жол вагондарымен 1,9 млн және автомобиль арқылы 80 мың тоннаға жуық жүкті құрады.
Өткен жылы автомобиль терминалының жұмыс қорытындысы бойынша 2351 жүк автокөлігі және 437 жеңіл автокөлік өңделді. Жолаушылар айналымы 3623 адамды құрады. Темір жол терминалы арқылы 23948 вагон ауыстырып тиелді.
Бүгінгі күні Құрық – Алат – Құрық бағытында ғана тұрақты хабар беру, болашақта Иран және Түркменстан бағыттарда басқа паромдық желілерді іске қосу жоспарлануда. Паромдар сыйымдылығы 54 темір жол вагонына дейін немесе 35 үлкен жүк автомобилін құрайды. Айлақтардың жалпы жобалық қуаты жылына 6 млн.
Порт аумағында жүктерді жедел өңдеу үшін заманауи техникамен жабдықталған және барлық жаңа технологиялармен жабдықталған кедендік ресімдеудің әмбебап ғимараты жұмыс істейді. Мұнда "бір терезе" қағидасы бойынша қызмет көрсетіледі. Бір жерде барлық мемлекеттік қызметтер – кеден, шекара қызметі, фитосанитария, ветеринария, порт қызметтері шоғырланған. Туристер мен жолаушыларға барлық жағдайлар жасалған. Қонақ үй, асхана, кафетерий бар.
Теміржол терминалының өткізу қабілеті – жылына 4,1 млн тонна, паромдарды өңдеудің толық циклінің орташа уақыты: бір қабатты – 6-8 сағат, екі қабатты – 10-12 сағат, бұл тәулігіне 5 паромды өңдеуге, ал автомобиль терминалының өткізу қабілеті – жылына 1,9 млн тонна, паромды толық өңдеудің орташа уақыты – 14-16 сағат, бұл тәулігіне 3 паромға дейін өңдеуге мүмкіндік береді.
Құрық порты – енді ғана аяғынан тұрып келе жатқан жас кешен. Жылдан жылға қуаттылығы артып келе жатқан айлақ биылғы жылы жоғары міндеттеме қабылдап отыр.
Әсел ТАҢАТАРОВА,
Маңғыстау