Қызылорда-Белкөл телімінде жарты шақырымдық жалқы рельс қолдың күшімен ауыстырылды

Қызылорда-Белкөл телімінде жолшылар бес сағаттық толаскез алып, жолдың жарты шақырымға жуық түйіспесіз рельсін ешбір техниканың көмегінсіз, өз күштерімен алмастырды. Қызылорда магистральдық желі бөлімшесіне қарасты Марат Оңалов басқаратын Қызылорда жол дистанциясының жолшылары телімнің 2822 шақырымында басталған жұмысты белгіленген уақытта бітіріп, 487 метрлік түйіспесіз рельсті алмастырып үлгерді. Жұмысқа дистанцияның 2-өндірістік телім басшысының орынбасары Рүстем Досымов, 2-5-6-7-айналым шеберлері Алпамыс Белгібаев, Асылбек Бекниязов, Әнуар Қосымбаев, Мақсат Әбдіраман мен Жомарт Дәненов және жолшылар жабылып, бас-аяғы 40 шықты адам жұмылып, берілген уақытты тиімді пайдалануға күш салды.

– Бүгінгі толаскезде 487 метрлік түйіспесіз рельс ауыстырылатындықтан алдын ала дайындық жүргізілді. Дайындық барысында жолшыларға арнайы пысықтау инструктажы өткізілді. Шиелі, Шорнақ және Қараөзек телімдерінен көмекке жолшылар шақырылды. Жаңадан рельс асты төсеніші салынып, түйіспесіз рельс орын ал- мастырылып қайта бекітілді. Мұндай толаскез кезінде барлық жұмыс қолмен атқарылады, себебі мына жер тар әрі көпірдің үсті, әрі қаланың ортасы, айнала тығыз орналасқан тұрғын үйлер болғандықтан жұмыс ұқыпты қолмен атқарылғаны дұрыс. Алдын ала белгіленген жұмыс көлемін бөліп алған жолшылар бірнеше топқа бөлініп, бірінің соңынан бірі конвейер секілді жұмыс жасап, техниктер оның сапасын бақылап отырды, – деді дистанцияның өндірістік телім басшысының орынбасары Рүстем Досымов.

Қолмен атқарылғандықтан асқан шеберлік пен дәлдікті қажет ететін «зергерлік жұмыстың» басы-қасында Сейдахмет Тасқынбай, Қанағат Зайыров және Айбек Есімов сынды тәжірибелі жол жөндеушілер жүргені, оның сапасына сын келтірмейді деген сенімде телім басшысы. Бұл телімде қос жол болғандықтан пойыздар толаскез жүргізіліп жатқан учаскеден кідіріссіз өткізілді.