Асыл - тастан, өнер - жастан
ҚТЖ жастар саясатының арқасында қаншама жас буын өсіп жетіліп, биік мақсаттары мен армандарына қол жеткізді. Жастар жылы қорытындыланып жатқан тұста солардың бірі – Шу жол дистанциясы бастығының орынбасары Дәулетбек Жолдасбаевты аз-кем әңгімеге тартып тілдескен едік.
– Дәулетбек, 10-14 желтоқсан күндері Елордада өткен жас теміржолшылардың кезекті Х форумынан алған әсерің қандай?
– Бұл дәстүрлі форумды біз жыл сайын асыға тосатынымызды неге жасырайын. Өйткені, онда көптеген келелі әңгімелер айтылады, көшелі бастамалар көтеріледі. Ең арысы, бір-бірімізбен тәжірибе алмасып, көрген-баққанымызбен бөлісеміз. Биыл да осы үрдістен жаңылған жоқпыз. Аталған алқалы жиынға Жамбыл облысынан он алты жас теміржолшы барып-қайтты. Көп дүниені үйрендік, көңіл көкжиегін кеңейттік. Форум «БЛАГО» (қауіпсіздік, көшбасшылық, амбиция, мақтаныш, жауапкершілік) тақырыбымен өтті. Саламызға қатысты соңғы технологиялармен таныстық, өзге өңірлердегі әріптестерімізбен емен-жарқын әңгімелесіп, пікірлерімізбен бөлістік. Қайырымдылық шарасына атсалыстық. Ең бастысы, елордаға барып, келген он алтымыздың да дайындықтарымыз жоғары деңгейде болды.
– Былтырғы форумда «ҚТЖ» ҰК» АҚ Басқарма төрағасы Сауат Мыңбаев: «Жастар – өзгеріс көшбасшысы» деген ұжымдық бағдарлама әзірледік. Соның аясында келесі жылы компанияның жүз жаңа есімін анықтаймыз. Қызметте өте белсенді, тың қабілеті бар жас мамандар ғана іріктеуден өтеді» деген еді. Бұл жүздікке біздің өңірден ілінген жастар бар ма?
– Әрине, әлгінде айтылған он алты әріптесімнің ішінде бес маман жүз жаңа есімнің қатарынан табылдық. «Жастар – өзгерістер лидері!» жаңа корпоративтік бағдарламасы шеңберінде «ҚТЖ Лидері», Professional skills, «Үнемді өндіріс бойынша үздік жоба» мен «Цифрлы ҚТЖ» байқауларының жеңімпаздары МВА бағдарламасы бойынша білім алуға, халықаралық тәжірибеден өтуге және «Worldskills Hi-tech» Еуразиялық чемпионатына қатысуға мүмкіндік алды. Басшылықтың өзі осы жүздікке енген жастарды айрықша қолдауды, олардың қызмет жолдарын әркез бақылауда ұстауды тапсырды. Бұл біздің жұмысымызға деген жауапкершілігімізді арттырып, серпін берері сөзсіз. Реті келгенде айта кетейін, жастар форумы осымен 10-шы жыл қатарынан ұйымдастырылып отыр. Ал осы аралықта 2000-нан аса жас маман біліктіліктерін арттырып үлгерді. 70 қызметкер түрлі лауазымдарға тағайындалды, 2 маманға шетелде білім алуларына жолдама берілген екен. Көріп отырғаныңыздай, біздің компаниямыз техникалық жұмыстардан бөлек, жастар саясатын жоғарғы деңгейде жүргізіп келеді. Тағы да бір мысал келтіре кетейін, қазіргі таңда «Қазақстан темір жолы» ұлттық компаниясында 52 мыңдай жас маман жұмыс істейді. Олардың 13 мыңы жетекшілік қызметтерді атқарады екен. Бұл – сөзсіз жоғарғы көрсеткіш. Компания басшылығы белсенді жастарға қашан да қолдау көрсетуге әзір екенін осыдан-ақ байқауға болады.
– Былтырғы форум аясындағы «Болашақ басқарушылар» және «Менеджмент жобасы» конкурстарында біздің өңірімізден ұсынылған екі жобаның топ жарғаны есімізде. Қателеспесем, оның бірінің жетекшісі сіз болуыңыз керек...
– Дұрыс айтасыз, былтырғы жиында жанжақтан келген жас теміржолшылардан 200-дей жоба ұсынылып, 45-і таңдап алынған. Басшылық тарапынан олар жіті сараланып, зерделеніп, үздіктері марапатталды. Бірінші орынды «Жамбыл магистральдық желісі» филиалының жол диспетчері Ұлан Жүндібаев «Сигналист» датчигі жобасымен жеңіп алған еді. Бұл датчиктің ерекшелігі сол, жылжымалы құрамның жақындап қалғандығын, жұмысшыларға дер кезінде жолды босатуы керектігін алдын ала ескертеді. Сол жолы үшінші орынды да біздің өңір еншілеген болатын. Менің жетекшілігіммен жұмыс істеген топ – №3 телім басшысының орынбасары Асхат Райымқұлов, жол монтері Азамат Құндызбаев, бригадир Бақытжан Тілепбергенов, машинист-автомотористер Азамат Сыдықов пен Жандос Нұрқалықов ұсынған «Электрондық деректер базасы – түйіспейтін жол» жобасы үздіктердің қатарынан көрінді. Ал бұл жобаны түйіспейтін жолдың жағдайын бақылауға арналған бағдарлама (ЭБД-БП) деуге әбден болады. Алдыңғы жылы да Жамбыл өңірінен ұсынылған жоба бірінші орынды жеңіп алған болатын.
– Биылғы бәсеке қалай болды? Ұсынған жобаларыңыз іріктеуден өтті ме?
– Бұл жолы да құрқол қайтқан жоқпыз. Аталған форумға «ҚТЖ-ескертпе» жобасымен барған едік. Іріктеуден оң баға алып, үшінші жүлдені қанжығаладық. Бұл мобильдік қосымшаның артықшылығын айтайын, біздің салаға қатысты барлық ережелер, ескертпелер, техникалық қауіпсіздік шаралары бір бағдарламаға жинақталған. Оны ұялы телефонына жүктеп алған кез келген теміржолшы кез келген жерде, тіпті ғаламтор желісі ұстамайтын аймақтан да көре алады.
Мұндай мобильдік қосымша жасауымыздың себебі де жоқ емес. Теміржол қай кезде де қауіпті аймаққа жатады. Оның бойындағы төтенше оқиғалар, жұмыс барысындағы қателіктер қай кезде де орын алып жататынын жасыра алмаймыз. Олардың көпшілігінің себебі сол, ескертпелерді білмегендіктен, ережелерді ескермегендіктен. Демек, біздің бағдарламамыз жол бойындағы қауіпсіздікті жетілдіруге бағытталған деп біліңіз.
– Бәрекелді, «ақыл – тастан, өнер – жастан» деген, еңбектеріңіз жемісті бола берсін!