«ҚТЖ-Жүк тасымалы» ЖШС-нің озат қызметкерлері түрлі наградаларға ие болды

Тәуелсіздік күні қарсаңында «ҚТЖ-Жүк тасымалы» ЖШС-не қарасты мекемелердің үздік қызметкерлері мемлекеттік және ведомстволық наградалармен марапатталды. Салтанатты жиында барша әріптестерін мерекемен құттықтаған «ҚТЖ-Жүк тасымалы» ЖШС бас директоры Владимир Петров биыл темір жол үшін табысты жыл болғанын атап өтті.

«2021 жыл – тәуелсіздік жылдары ішінде ең көп жүк тасымалы жүзеге асырылған жыл. Пандемиямен қатар келген қиын кезеңнің өзінде осындай жетістікке жетіп отырмыз. Бұл табысқа барша теміржолшылар қауымының қажырлы еңбегінің арқасында қол жеткізілді. Солардың ішінде ерен еңбегімен көзге түскен азаматтар бүгін лайықты марапаттарға ие болмақ. Олардың бәрі де тасымал табысын еселеуге үлес қосқан еңбек ерлері», – деп баға берді ол.

Сонымен «Адал еңбегі үшін» белгісімен темір жолда 40 жыл жұмыс істеген коммерциялық жұмыс департаментінің менеджері Айман Қасенова ма- рапатталды. «Кәсібі бойынша үздік» атағы Ақмола бөлімшесі Тасымалдарды басқарудың бірыңғай диспетчерлік орталығының аға диспетчері Марат Ахметжановқа берілді. Оның темір жолдағы жұмыс өтілі – 35 жыл. Сонымен қатар «ҚТЖ» ҰК» АҚ басқарма төрағасының Құрмет грамотасы 5 сала маманына, «ҚТЖ» ҰК» АҚ басқарма төрағасының Алғыс хаты 3 қызметкерге, «ҚТЖ-Жүк тасымалы» ЖШС бас директорының Құрмет грамотасы 8 теміржолшыға берілді. Бұған қоса «ҚТЖ-Жүк тасымалы» ЖШС Бас директорының Алғыс хаты 10 адамға табысталды. «ӘТЖК 100 жыл» медалімен локомотив шаруашылығы департаментінің бас менеджері Серік Әбенов марапатталды. «Отпантау-2021» жедел-штабтық оқу-жаттығуының әскери техникасын тасымалдауды қамтамасыз ету жөніндегі іс-шараларды сапалы ұйымдастырғаны үшін пойыздар қозғалысын басқару департаментінің аға диспетчері және бас менеджері Бауыржан Абдуллаев пен Шыңғыс Мерғалым да марапатқа ие болды.