«Жолаушылар тасымалы» АҚ басшылығы «Оңтүстік» филиалына барды
Алматы станциясында «Жолаушылар тасымалы» АҚ бас директоры Жәнібек Тайжанов «Оңтүстік» филиалы және «Экспресс» филиалы Алматы телімінің еңбек ұжымымен кездесіп, оңтүстік өңірде пойыздарды рейске дайындаудың технологияық процесімен танысты.
Еңбек ұжымымен кездесудегі әңгіме барысында «Жолаушылар тасымалы» АҚ басшысы жұмысшылардың бастамаларын тыңдап, еңбек қорғау және қауіпсіздік, пойыздардағы сервисті жақсарту мәселелеріне назар аударды.
«Жолаушылар тасымалы» АҚ басшылары Алматы-1 вокзалы билет кассирлерінің еңбегін бағалап, жүк бөлімшелерін қарады, халық арасында багаж тасымалына сұраныстың бар екенін атап өтті. Сосын олар «Вагонсервис» АҚ жөндеу және вагон жуу цехына, «Экспресс» филиалы вагонға техникалық қызмет көрсету қосынына барып, залалсыздандыру әсері бар сілтілі заттарды пайдалана отырып вагондардың сыртын жууға және тазалауға арналған вагон жуғыш құрылғылар жұмысымен және вагон бөлшектерімен, тораптардағы технологиялық процеспен танысты.
«Жолаушылар тасымалы вагондардың жағдайы мен жөндеу сапасына байланысты болады. Біз үшін жолаушыларға сапалы сервистік қызмет көрсету, жолаушылар тасымалының сенімділігін қамтамасыз ету маңызды», - деді Жәнібек Тайжанов.