«Көлік министрлігі пойыз вагондарын жаңарту бойынша жүйелі жұмыс жүргізіп келеді» – министр
Бүгін ҚР Парламенті Мәжілісінің депутаттары атқарылған жұмыс шеңберінде есеп беріп, Үкімет мүшелері – министрлерге өз сауалдарын жолдады.
Отырыс барысында көлік министрі Марат Қарабаев авиабилет бағасын төмендету бойынша қабылданып жатқан шаралар, сондай-ақ «Астана-Алматы», «Талдықорған-Өскемен» және «Үшарал-Достық» автомобиль жолдарын қайта жаңарту жөніндегі жобалардың іске асырылу барысы туралы халық қалаулыларының тарапынан туындаған сұрақтарға жауап берді.
Теміржол саласындағы жолаушылар тасымалының сапасы төңірегінде қойылған сауалға жауап бере отырып, Көлік министрлігінің басшысы аталған мәселе жылжымалы құрам паркінің жай-күйіне тікелей байланысты екенін атап өтті. Бүгінгі таңда жолаушылар вагондары паркінің орташа пайдалану мерзімі 18 жылды құрайды. Ведомство басшысының айтуынша, 2010 жылдан бастап бүгінге дейін 1 238 вагон сатып алынған.
«Жолаушылар тасымалының сапасын жақсарту мақсатында көлік министрлігі вагондар паркін жаңарту және вагон ішіндегі сервис сапасын жақсарту бойынша жүйелі жұмыстарды жүргізіп келеді. Биыл отандық «ЗИКСТО» зауытымен 150 вагон сатып алу бойынша шарт жасастық. Өткен жылы Stadler компаниясынан 537 вагон сатып алуға келісімшарт жасалған болатын. Келер жылы қосымша 157 вагон сатып алуды жоспарлап отырмыз», - деді Марат Кәрімжанұлы.
Осылайша, қолға алынған нақты шаралардың нәтижесінде 2030 жылға қарай вагондарды орташа пайдалану мерзімі 18 жылдан 13 жылға дейін төмендейді деп жоспарланып отыр.