Ұлттық дәстүр ұлықталған күн
![](https://rail-news.kz/uploads/2024/03/28/PjdhhvMnsEqewTf9YIUjnDRoi3XMN1vxnPB08rAm.jpg)
![](https://rail-news.kz/img/noimg.png)
"Қазақстан теміржолшысы" газетінің Жамбыл облысындағы меншікті тілшісі
Биылғы Наурыз мерекесі Рамазан айына тұспа-тұс келгендіктен, Жамбыл жүк тасымалы мен магистральдық желі бөлімшесі бірігіп, Ұлыстың ұлы күнін Тараз қаласындағы «Севинч» мейрамханасында атап өтіп, 400-ге жуық теміржолшыға ауызашар берді.
Мерекеге орай мейрамханаға қос бөлімшеге қарасты мекемелердің қызметкерлері ұлттық киіммен келді. Ақ дастарханның басында Наурыз бата беріліп, қазақтың салт-дәстүрінен көріністер көрсетіліп, ұлттық құндылықтар ұлықталды.
![](https://rail-news.kz/uploads/attachments/d84d4779-90e8-4b15-81d7-8d36e4f5b17b-660505777e33f.jpg)
Жамбыл жүк тасымалы бөлімшесінің директоры Айдын Сеитбенбетов пен Жамбыл магистральдық желі бөлімшесі директорының бірінші орындасары Дәулетбек Жолдасбаев, ардагерлер кеңесінің төрағасы Бауыржан Найманбаев теміржолшыларды Наурыз мерекесімен құттықтап, бірқатар марапаттар табыс етті.
![](https://rail-news.kz/uploads/attachments/3cfa2df8-889a-4c22-91bb-af343a41b0d2-6605058827f0b.jpg)
Мерекелік іс-шарада ТЧЭ-31 Жамбыл локомотив депосының қызметкерлері қадамын қаз-қаз басқан бүлдіршіннің тұсауын кесіп, жөн-жоралғысын жасады. Ал ВЧД-27 Жамбыл вагон пайдалану депосының жастары беташар дәстүрінен көрініс дайындап, Жамбыл магистральдық желі бөлімшесіне қарасты мекемелер бесікке салу рәсімін жасап, жөн-жоралғыларды көрсете отырып, ырым-тыйымдарды да еске салды.
Наурыз думанын Тараз вокзалының қыз-жігіттері айта келген Жарапазан қыздыра түсті. Ұлттық спорт жарыстары да ұмыт қалған жоқ. Бөлімшелер мен мекемелер арқан тартыстан бәсекеге түсіп, кім мықтыны анықтады. Ұлттық дәстүрді жаңғыртып өнер көрсеткендер түрлі сый-сияпатқа ие болып, ең ерекше ұлттық киім киген қызметкерлер де марапатталды.
![](https://rail-news.kz/uploads/attachments/d54d8aa0-4b5b-44ac-b4f4-d3ba80e47d5c-6605058de22c2.jpg)
![](https://rail-news.kz/uploads/attachments/eea78c33-2db9-45b2-89de-ed87ae57817c-660505932b76d.jpg)