Мемлекеттік тіл мәртебесі ұлықталды

«ҚТЖ» ҰК» АҚ мен оның еншілес ұйымдарында мемлекеттік тіл саясатын іске асыру жөніндегі комиссияның биылғы маусымдағы отырысының шешіміне сәйкес мемлекеттік тілді насихаттау мақсатында жаттықтырушылар мен халыққа танымал тұлғаларды тарту арқылы іс-шаралар ұйымдастыруға шешім қабылданған.  

Осыған орай «ҚТЖ» ҰК» АҚ Көпфункционалды қызмет көрсету орталығының Мемлекеттік тілді дамыту секторының ұйымдастыруымен «Тіл құбылысының ұлттық мазмұны және мемлекеттік мәртебесі» тақырыбындағы шеберлік сабағы бұрын қатысқан қызметкерлердің талап-тілегі бойынша тағы да ұйымдастырылып, одан әрі жалғасын табуда.    

Компания кітапханасында өткен шеберлік сабағын бұл жолы да көптің сұрауымен мемлекет және қоғам қайраткері, «Құрмет» және «Парасат» ордендерінің иегері, ұлт және тіл жанашыры Оразкүл Асанқазықызы өткізді. Жиын мақсаты – компания қызметкерлерінің мемлекеттік тілдің қолданыс аясын кеңейтуге деген ниетін ояту, ұлттық құндылықтарымыздың мазмұнын ашып, қоғамға қызмет етуге мемлекеттік тілдің әлеуетті екендігіне көз жеткізу, теміржолшылардың ана тілінде сөйлеуге, жазуға, ойлауға деген құлшыныстарын арттырып, қазақ тілін іс жүзінде пайдалануға шабыт беру. Бұл жолы жиынға Орталық аппараттың құрылымдық бөлімшелерінің, тораптық деңгейдегі филиалдардың, еншілес ұйымдардың басшылары мен олардың орынбасарлары қатысты.  

– Ұлттық намысымызды оятатын, жанды жерімізге тиетін сөздер айтты. Қазақша білмейміз деп айта алмаймыз, ана тілімізде сөйлейміз. Техникалық терминдерді қазақша сөйлету қиын. Ол ретте сөздіктерді қолданамыз. Жалпы жұмыс жүріп жатыр. Ал Оразкүл апайымыздың сабағына қатысу арқылы біз басқа, одан да терең нәрсені ұқтық. Күнделікті мемлекеттік тілге қатысты мәселелерге асықпай, ақыры іске асырылады деп екінші орынға қойып келсек, бұл сабақтан кейін оны мүлдем екінші орынға қоюға болмайтынын, уақыт өтіп жатқанын, әрекет ету керектігін және оны өзімізден бастау керегін  түсіндік, – дейді «ҚТЖ» ҰК» АҚ Біріктірілген жоспарлау дирекциясының бас менеджері Гүлзада Тұрғалиева.