ҚТЖ темір жол өткелдерінде жүру ережелерін бұзғандарға жауапкершілікті қатаңдатады
ҚТЖ мемлекеттік органдарға теміржол өткелдерінен жүру ережелерін бұзғаны үшін жауапкершілікке тарту шараларын қатаңдату туралы өтініш білдіруді жоспарлап отыр, деп хабарлайды Rail-news.kz.
Бұл бастама теміржол қауіпсіздігін арттыруға және жолаушылар мен теміржол қызметкерлерінің өмірі мен денсаулығын қорғауға бағытталған. Бұған дейін ҚТЖ "Әкімшілік құқық бұзушылық туралы" ҚР Кодексіне өзгерістер енгізу жөнінде ұсыныстар енгізуге бастамашы болған еді.
Олар қозғалыс қауіпсіздігін бұзу жағдайларына, жол-көлік оқиғаларына, сондай-ақ белгіленбеген жерлерден темір жолдары арқылы өтуге, жол бойындағы жолақтарда мал жаюға кінәлі адамдарға әкімшілік-қылмыстық жауапкершілікті қатаңдатуға бағытталған.
ҚТЖ жауапкершілікті қатаңдату оқиғалардың санын азайтуға және жол қозғалысына қатысушылардың барлығының жауапкершілігін арттыруға көмектесетініне сенімді.
2025 жылғы қаңтар-ақпанда теміржол өткелдерінде автокөлік құралдары жүргізушілерінің жол қозғалысы ережелерін бұзуына байланысты 4 жол-көлік оқиғасы (ЖКО) орын алды, бұл жолаушылар мен теміржол қызметкерлерінің қауіпсіздігіне қауіп төндірді. 1 наурызда Тендік станциясының теміржол өткелінде жүк көлігі жүргізушінің кінәсінен жүк пойызымен соқтығысты. Апат салдарынан локомотив бригадасының қызметкерлері зардап шекті, ал локомотив пен 11 бос вагон рельстен шығып кетті.
2024 жылы теміржол өткелдерінде 26 жол-көлік оқиғасы тіркелді.
ҚТЖ жол қозғалысының барлық қатысушыларын теміржолдағы қауіпсіздік ережелерін қатаң сақтауға шақырады.