Транскаспий дәлізі: Қазақстанның көлік және цифрлық инфрақұрылымдағы жаңа бағыты

Қазіргі геосаяси жағдайда елдегі транзиттік бағыттарды әртараптандыру шарасы аса маңызды болып отыр. Әсіресе Орта дәліздің өзектілігі күшейе түсті. Жақында Каспий теңізінің түбімен Қазақстан мен Әзербайжан арасында жоғары жылдамдықты интернет-кабель тарту жұмыстары басталды. Сонымен бірге, Транскаспий мұнай-газ құбырын салу мүмкіндігі де зерделеніп жатыр, деп жазды egemen.kz.

2024 жылдың қорытын­дысында Орта дәліз арқылы тасымал көлемі бұрнағы жылмен салыстырғанда 65%-ға арт­қан. Еуразияның дәл орта тұсы­на орналасқан елімізде 11 халықаралық транзиттік дәліз бар. Өткізу қабілетін арттыру мен жүк тасымалындағы жағдайды жақсарту мақсатында жалпы ұзындығы 1,3 мың км болатын 4 ірі теміржол жобасының құрылысы жалғасып жатыр. Олардың қата­рында Достық – Мойынты, Алма­ты айналма желісі, Дарбаза – Мақтаарал, Бақты – Аягөз темір­жол магистралдары бар. Бұл жобалар тауар тасымалдау мен логистикалық инфрақұрылымды жақсарту үшін стратегиялық маңызға ие.

Былтыр 12 мың км автожол жөндеуден өтсе, соның 7 мыңында жұмыс аяқталды. Қарағанды – Алматы, Талдықорған – Өскемен, Ақтөбе – Қандыағаш, Бұқтырма көпірі, Шамалғандағы жол айрығы мен Түркістан өңіріндегі тунель транзиттік қозғалыстың сапасын едәуір арттырды. Биыл жөндеу жұмыстары 13 мың км жолды қамтиды. Оның қатарында республикалық маңызы бар жолдардың 2 мың км-де қайта жаңғырту, облыс орталықтары арасындағы 6,6 мың және жер­гілікті жолдардың 4,2 мың км-і жөнделмек. Жыл соңына дейін 9 мың км жолда жұмыстар то­лық аяқталалы.

Мемлекет басшысының тап­сыр­масына сәйкес, 10 мың км транзиттік автожолда ор­таша жөндеу жұмыстары жалғасып жатыр. Жоба «Қазақ­стан Даму Банкі» арқылы қаржы­ланды­рылған. Жөндеу жұмыстары өңір­аралық және ауданаралық байланыстарды жақсартады. Негізгі бағыттар – Қандыағаш – Шалқар, Жезқазған – Петропавл, Атырау – Доссор, Жаңаөзен – Кендірлі – Түрікменстан шекарасы, Қарағанды – Аягөз.

«Орташа жөндеу реконс­трукциямен салыстыр­ған­да 7 есе арзан әрі 2 есе жылдам жүреді, сондықтан бұл әдіс транзиттік инфра­құрылымды тиімді дамы­туға мүмкіндік береді. Мұндай шаралар республикалық жол­дар­дың 94%-ын нормативтік талаптарға сәйкестендіруге жол ашады. Бұл өз кезегін­де транзит ағынын тарту­ға, қозғалыс қауіпсіздігін арттыруға және экономикалық тиімділікке оң әсер етеді», дейді Көлік министрлігі, Автожол комитеті төрағасының орынбасары Жамбыл Бақтияр.