Ұлы ақынды ұлықтады

«ҚТЖ-Жүк тасымалы» ЖШС ұлы ақын, ойшыл, философ, қазақтың рухани жаңғыруының символы – Абай Құнанбайұлының 180 жылдық мерейтойына орай мазмұны терең, тағылымы мол мәдени іс-шара өткізді.

Шараның алғашқы бөлігі – рухани бағыттағы пікір алмасу алаңында қатысушылар Абайдың өмір жолы, шығармашылық мұрасы, қара сөздеріндегі терең философиялық ойлар және олардың қазіргі қоғамдағы мән-маңызы туралы ой қозғап, өзара пікір алмасты. Дөңгелек үстел барысында Абайдың адамгершілік қағидалары мен ұлттық құндылықтарды дәріптеудегі рөлі сөз болды.  

Келесі кезеңде қатысушылар танымдық әрі қызықты форматтағы «Qwiz Show» интеллектуалдық сайыс өткізді. Оларға Абайдың өмірбаяны, өлеңдері, қара сөздері, қанатты сөздері мен шығармаларындағы тәрбиелік мәнге қатысты сұрақтар қойылып, өз білімдерін сынға салды.  

Іс-шараға арнайы шақырылған Л.Н.Гумилев атындағы Еуразия ұлттық университеті жанындағы «Абай академиясы» ғылыми-зерттеу институтының директоры, PhD докторы, филология ғылымдарының кандидаты, доцент Жандос Әубәкір, тағы басқа қонақтар тың деректермен, қызықты фактілермен және Абай мұрасының мәнін тереңнен түсіндіретін әсерлі әңгімелерімен бөлісті.  

«Бүгін біз Абай Құнанбайұлының туғанына 180 жыл толуына арналған мерекелік іс-шарада бас қосып отырмыз. Осы мерейтой – тек ұлы тұлғаны еске алу ғана емес, оның өшпес мұрасын жаңа буынға жеткізудің маңызды сәті. Абай – қазақ халқының мақтанышы, ұлт руханиятының темірқазығы, даналықтың символы. Өндіріс саласында еңбек етіп жүрген теміржолшылардың да ақынның өлеңдерінен, әндерінен, қара сөздерінен рухани нәр алып, ұлы Абайды ұлықтап, керемет кеш өткізгеніне шын қуанып отыр. Өркендерің өссін, Абайды танудағы білім көкжиектерің кеңейе берсін», – деп ақжарма тілегін жеткізді Жандос Мағазбекұлы.