ҚТЖ-да Абай Құнанбайұлының 180 жылдығына орай әдеби кеш өтті
«Қазақстан теміржолшысы» газетінің тілшісі
Абай Құнанбайұлының 180 жылдығына орай «ҚТЖ» ҰК»АҚ «Әкімшілік басқармасы» филиалы «Абай мұрасы – халық қазынасы» атты әдеби кеш ұйымдастырды.
Жиынды ашқан филиал директорының сервистік қамтамасыз ету жөніндегі орынбасары Асхат Саликов ұлы ақынды ұлықтау ұлттық мұрамыз бен құндылықтарымызды дәріптеу екенін тілге тиек етті.
– Әрине, Абай атамыз туралы айта беру артық емес. Бір қарағанда таныс тақырып, таныс бейне секілденгенмен, ол туралы білетініміз тым аз-ау. Ұлылықтың сырына қанық болғымыз келсе, даралықтың қандай болатынын ұғынғымыз келсе, дана Абай әлемін шарлап қайталық, құрметті халайық! – деді ол.
Одан әрі компания қызметкерлері ақын шығармаларынан үзінді оқыды. Сондай-ақ «Әкімшілік басқармасы» филиалы қызметкерлерінің қатысуымен «Әділдік жайлы әңгіме» театрландырылған көрінісі қойылды. Сонымен қатар Абайдың өмірі мен шығармашылығына байланысты сұрақтарға кезек беріліп, белсенді қатысып, дұрыс жауап бергендерге кішігірім сый-сыяпаттар тарту етілді. Аталған филиал қызметкерлері, нақтырақ айтқанда, Асхат Саликов, Жандос Асылханов, Айнұр Смағұл, Айжан Қажымұратова, Бекзат Халилин ақынның өлеңдері мен қара сөздерін жатқа оқыды. Әдеби кеште ақынның сазгерлігі туралы да айтылып, филиал қызметкері Ерболат Бейсеев Абайдың әнін домбырамен орындап берді.
Компанияның Орталық аппарат ардагерлерінің төрағасы Берік Айтбеков сөз сөйлеп, кештің жоғары деңгейде ұйымдастырылғанына алғысын білдірді. Кешке қатысушылар Абайдың «Көзімнің қарасы» әнін бірге шырқады. Жиын филиал қызметкері Жандос Асылхановтың орындауында «Атамекен» әнімен аяқталды. Кешке қатысушыларға арнап ұйымдастырушылар ұлттық тағамдар қойылған дастархан жайып, бәріне дәмнен ауыз тигізді.