Елордалық 1200 астам оқушы мен студент Теміржол көлігі мұражайында болды
Мемлекет басшысы жариялаған Жұмысшы мамандықтарының жылы «Қазақстан темір жолы» ҰК» АҚ, Қазақстандық теміржол көлігі қызметкерлерінің салалық кәсіподағы Астана қаласы әкімдігімен бірлесіп «Астана қаласының оқушылары мен студенттеріне арналған кәсіптік бағдарлау экскурсиялары» жобасын іске асырды, деп хабарлайды Rail-news.kz.
Іс-шара аясында Орталық теміржол көлігі мұражайына 7 – 11 сынып оқушылары мен колледж студенттерінен құралған 1200 астам бала келді. Мұражай апта сайын 100 жуық қатысушыны қабылдады. Балалар үшін түрлі форматтағы экскурсиялар, соның ішінде тақырыптық викториналар мен интерактивті тапсырмалар ұйымдастырылды.
«Экскурсиялар балаларға теміржол саласын жақынырақ білуге, мамандарымыздың еңбегін көруге, заманауи технологиялармен және болашақ мамандық мүмкіндіктерімен танысуға көмектеседі. Бұл жұмыс жұмысшы мамандықтарын дәріптеу және техникалық білім беруді дамыту жөніндегі мемлекеттік міндет тұрғысында ерекше маңызға ие болады. Сала өкілдерімен кездесулер жастардың өндірістік кәсіптердің рөлін дұрыс түсінуін қалыптастырады және кәсіби өсу үшін жаңа көкжиектер ашады», - деп атап өтті музей меңгерушісі Ақмарал Молдашева.