Талғат Алдыбергенов Ерейментау вокзалы құрылысының барысын тексерді
Бүгін Ақмола облысына жұмыс сапары аясында «ҚТЖ» ҰК» АҚ Басқарма Төрағасы Талғат Алдыбергенов Ерейментау қаласындағы теміржол вокзалы құрылысының барысымен танысты, деп хабарлайды Rail-news.kz.
Жалпы ауданы 430 шаршы метрлік нысан шағын вокзалдар санатына жатады және қайта отырғызумен жүретін транзиттік жолаушыларға қызмет көрсетуге арналған.
Бүгінгі таңда нысанның дайындығы шамамен 50% құрайды. Ғимарат қаңқасын салу мен шатырын жабу толығымен аяқталды. Ішкі әрлеу жұмыстары, инженерлік коммуникацияларды монтаждау, аумақты абаттандыру, сондай-ақ перронды қайта құруға дайындық жүргізілуде.
Естеріңізге сала кетейік, елімізде вокзал инфрақұрылымын жаңартудың ауқымды бағдарламасы жүзеге асырылуда. 120 астам теміржол вокзалы қайта жаңартылып жатыр. Ақмола облысында 16 нысанда жұмыстар жүргізіліп жатыр.
Сонымен қатар, Талғат Алдыбергенов Ерейментау – Астана маршрутында жолаушылар тасымалын ұйымдастыру бойынша жұмыс барысын тексерді. Жолаушылардың жайлылығы, пойыз бригадаларының жұмыс жағдайлары, қозғалыс кестесін сақтау және сервис сапасын одан әрі арттыру мәселелеріне ерекше назар аударылды.
