Сала дамуына үлес қосқан теміржолшылар құрметті демалысқа шықты
«Қазақстан теміржолшысы» газетінің тілшісі
Кеше «ҚТЖ-Жүк тасымалы» ЖШС басшылығы мен ұжымы серіктестіктің екі бірдей маманын құрметті зейнет жасына шығарып салды. Серік Баймағамбетов пен Асқар Сағындықов салада ондаған жылдар еңбек етіп, Қазақстан темір жолының дамуына елеулі үлес қосты.
«ҚТЖ-Жүк тасымалы» ЖШС бас директоры Асан Үмбетов ұжымы мен өз атынан ыстық ықылас тілегін білдіре отырып, қос маманның көп жылғы адал еңбектері үшін зор алғыс білдіріп, қазақы дәстүрмен иықтарына бағалы шапан жапты.
Серік Қайырбекұлы теміржол саласындағы еңбек жолын 2000 жылы еліміздің Көлік және коммуникациялар министрлігінде ұзақ мерзімді жоспарлау және мониторинг бөлімінің бастығы қызметінен бастап, көп жылғы еңбек жолында теміржол саласының әртүрлі ұйымдарында жауапты басшылық қызметтерді атқарады. Ал 2019 жылғы 15 шілдеден бастап бүгінгі күнге дейін «ҚТЖ-Жүк тасымалы» ЖШС Тәуекелдерді басқару және ішкі бақылау секторына басшылық еткен.
Асқар Советбекұлының еңбек жолы 2009 жылы «Көлік сервисі орталығы» АҚ-да бас инженер қызметінен бастаған екен. Әр жылдары логистика, халықаралық ынтымақтастық, корпоративтік даму, қоғаммен байланыс және мемлекеттік құпияларды қорғау салаларында жауапты басшылық қызметтерді абыроймен атқарды. Бүгінгі күнге дейін ол «ҚТЖ-Жүк тасымалы» Мемлекеттік құпияларды қорғау тобының бас менеджері болып жұмыс істеді.
Қос зейнеткер өткен күндерден естеліктерімен бөлісіп, еңбек жолында үзеңгілес болған іні-қарындастарына теміржол саласының өркендеуіне адал қызмет ете беріңдер деп тілек білдірді.