Клиентке бетбұрыс жалғасуда
«Қазақстан теміржолшысы» газетінің тілшісі
«ҚТЖ-Жүк тасымалы» АҚ басшылығының тапсырмасымен темір жол бөлімшелерінде клиентке бағдарлану жұмыстарын жандандыру жалғасын табуда.
Мәселен, Маңғыстау ЖТ бөлімшесінде клиенттердің арасынан ең белсенді кәсіпорындар басшыларымен жеке-жеке кездесу ұйымдастырылып, олардың теміржол көлігін пайдалану барысындағы туындайтын қиындықтары зерттелуде. Кезекті кездесуді олар Шетпе станциясындағы «Нұра» ЖШС өкілдерімен өткізді. Құрылыс материалдарын, негізінен қиыршық тастар тиейтін кәсіпорын 2000 жылдан бері темір жол қызметін пайдаланып келеді. Олардың айтуынша, қиыршық тас тасымалдағанда мүмкіндігінше жаңа вагондар керек. Бұл жүктің жол бойына сусып түспеуін қамтамасыз етеді. Жүк тиеуге вагон берген кезде техникалық тексеру жұмыстарын күшейту керек деп санайды. Сонымен қатар олар өздерін темір жолдың негізгі әріптестерінің бірі ретінде атайды. Темір жолмен тасымалдаған кәсіпорыннан шығатын қиыршық тас Құрық кеме кешенін салуда қолданылды.
Филиалдың тағы бір ірі клиенттерінің бірі – «Petroleum» ЖШС. Мұнай-газ секторында көліктің қызметтердің толық спектрін көрсететін кәсіпорын филиалы Ақтау қаласында орналасқан. Олардың айтуынша, кеңсе техникасы мен бағдарламалық қамтамасыз етуді жаңартса жақсы болар еді. Бұл клиенттерге жедел қызмет көрсету сапасын жақсартар еді. Бүгінде «Қазтеміртранс» АҚ ұлттық операторының паркін 100 пайыз пайдаланып отырған кәсіпорын мамандары темір жолға қатысты барлық туындаған қиындықтар мүмкіндігіне қарай дереу шешімін тауып жатқанын жеткізді.