ҚТЖ «Астана – Талдықорған» бағытында жаңа теміржол бағдарын іске қосты
Бұл бастама тұрғындардан түскен бірқатар өтінішке сәйкес қолға алынды. Бағытта жаңа үлгідегі RWS Wagon вагондары қатынайды, деп хабарлайды Rail-news.kz.
Пойыз құрамында екі купе және екі плацкарт вагоны бар. Күн ара қатынайтын жаңа бағыт елорда мен Жетісу облысы арасындағы тұрақты қатынасты жолға қояды. Астанадан шыққан вагондар алдымен №122/121 «Нұрлы жол – Семей» пойызының құрамында жүреді. Ақтоғай бекетінде олар №631/632 «Ақтоғай – Талдықорған» пойызына тіркеліп, әрі қарай Талдықорған станциясына дейін барады.
Пойыз Астанадан (Нұрлы жол) 9 сәуірден бастап тақ күндері сағат 06:32-де аттанып, Талдықорғанға келесі күні 11:05-те жетеді. Кері бағытта Талдықорғаннан 10 сәуірден бастап жұп күндері сағат 12:15-те шығып, Астанаға 19:30-да келеді. Жол жүру уақыты шамамен 28 сағатты құрайды.
«Жаңа 45-үлгідегі вагондар заманауи талаптарға сай. Вагондардың ішкі интерьері мерзімінен ерте тозуды болдырмайтын арнайы материалдардан жасалған. Сондай-ақ, мұнда климат-бақылау мен ауа тазарту жүйелері, жиналмалы жатын орындар, USB-порттар мен 220В розеткалар, Wi-Fi, LED-жарықтандыру және сапалы жылу оқшаулағыш орнатылған. Жолаушылар қауіпсіздігі үшін бейнебақылау, өрт сөндіру жүйелері және кондиционер қарастырылған. Бұдан бөлек, дыбыстық ақпарат беру, электронды таблолар мен шығу есіктерінің жарықтандырылуы бар», – деп атап өтті «Жолаушылар тасымалы» АҚ өкілдері.
Көлік саласының стратегиялық міндеттерін жүзеге асыруда жылжымалы құрамды жаңарту мен бағыттар аясын кеңейтуге басты басымдық беріледі.
