Орда бұзар жастағы маңғыстаулық маман екі рет «Қозғалыс қауіпсіздігі» белгісімен марапатталған

Жанарбек Якупбаев – Маңғыстау вагон пайдалану депосының Маңғыстау станциясындағы вагондарға техникалық қызмет көрсету пунктінде вагон қараушы. Жай ғана вагон қараушы емес, екі рет «Қозғалыс қауіпсіздігі» белгісімен марапатталған үздіктің үздігі. Еңбек жолын енді бастаған отыз жастағы жігіт үшін бұл – үлкен жетістік. Талай рет вагондардағы қауіпті ақауды анықтап, қозғалыс қауіпсіздігін сақтауға қосқан қомақты үлесі үшін 2019-2020 жылдары қатарынан екі рет марапатталған теміржолшы салада саусақпен санарлық. «Жүзден жүйрік» деген осы болар. Жанарбек марапатын мақтаныш етпейді, тым қарапайым, керісінше білмегенім әлі көп дейді, үнемі ізденісте. Жазда қашықтан оқу курсына қатысыпты, он күн ақтөбелік мамандардан білім алып, емтиханды сәтті тапсырған.

− Қазір көп вагондар жаңарып, техникалар, тіпті вагондардың бөліктері өзгеріп, бұрын-соңды көрмеген жаңа техникалар шығуда. Сондықтан вагон саласында қандай ақаулықтар болуы мүмкін, үнемі білім жетілдіріп отырмасақ қиын. Түрлі жағдай болады. Анықтау оңай емес ақаулар кездеседі. Мәселен, сондай бір жағдай күндізгі ауысымда жүргенімде кездесті. Жүк пойызына техникалық қызмет көрсету кезінде буксын балғамен ұрғанда дыбысы өзгешелеу естілді. Сырттан білінбейді. Бірақ мұқият тексере келе букстың 15 мм жылжығаны анықталды. Дереу құрамнан ағыттық. Дәл сол күні Құрық портынан келген пойыздан бүйірлік рамадағы жарықшақты таптым. Екі вагон да шет мемлекеттікі еді. Биылғы бірінші тоқсанда анықтаған ақаулық та сондай ерекше жағдайда табылды. Вагонның жұп доңғалағында жамалған тесікке жарықшақ түскен екен. Күндізгі ауысым болса да ерте қараңғы түскен кез. Ақауды шамның жарығымен таптым. Осы жылы одан басқа вагонның арбашық бөлігінен ұзындығы 180 мм жарықшақты анықтадым. Бұл вагондар қауіпті жүк таситын, яғни бензин мен сұйық газ таситын цистерналар еді. Екеуінің де ішінде жүгі болды, – дейді бұл туралы кейіпкеріміз.

Жанарбек – 1991 жылдың желтоқсанында түбектегі теміржолшылар жанұясында туған төрт баланың кенжесі. Әкесі марқұм Жұмабек Якупбаев 15 жасында теміржолда жұмыс істеп бастап, салаға 45 жылға жуық еңбегі сіңген майталман теміржолшы болыпты. Анасы Қалима Қайырқызы да 38 жыл теміржолда еңбек етті. Бірге туған бауырларының бірі вагон шаруашылығында бас маман, бірі пойыз диспетчері. Келіншегі Света да теміржолшы, қазір үш баласымен үйде отыр.

– Тәуелсіздіктің алғашқы жылдары отбасымыз үшін оңай болмапты. Ата-анам 1990 жылы Маңғыстау станциясына көшіп келеді. Бір бөлмелі үйде төрт баламен тұрады. Жалақыны бірнеше айда бір алатын уақыт болған. Сонда да теміржолдан кетпеген. «Түркіменстанда тұрғанда Қазақстан туралы тек естіп білдік, атақонысқа аяғымыз тисе деп армандадық. Тәуелсіз Қазақстанда өмір сүрген әр күнім жылға бергісіз, осы елде туып өсіп ер жеткен сендер бақыттысыңдар» деп отыратын әкем, – дейді тәуелсіздіктің құрдасы.