Шиелі вокзалындағы қызметкерлердің дені қыз-келіншектер
Қызылорда облысы бойынша меншікті тілші
Шығыстық сәулетпен салынған шырайлы Шиелі вокзалы тәулігіне екі жүзге жуық жолаушыға қызмет көрсетеді. Станцияға аялдайтын 11 жұп пойызынан түскен-мінген жолаушылардың сұранысын қамтамасыз етіп отырған вокзал ұжымының денін қыз-келіншектер құрайды.
Вокзал бастығы Алмат Досымов қызметкерлерінің басым бөлігі жолаушы қызметіне төселген, он-жиырма жыл, одан да көп тәжірибесі бар нағыз кәсіби мамандар екенін мақтанышпен жеткізді.
– Шиелі вокзалы – аймаққа алғаш теміржол келген сонау өткен ғасырдың 1903-04 жылдары іргесі қаланып, пайдалануға берілген тарихи нысан. Әлі күнге сүйегі мықты ғимарат, белгіленген уақыттарда күрделі жөндеуден өткізіліп тұрады. Оның толық күтімін жасап, жолаушыларға қызмет көрсетіп отырған әріптестерім Нұргүл Жанәділова, Гүлнар Нұрбаева, Гүлжанат Палманова, Қаншайым Елеуқызы және Гүлнар Құдайбергеновалардың қай-қайсысы да өз жұмыстарын кәсіби деңгейде меңгерген тәжірибелі жандар, – дейді вокзал бастығы Алмат Досымов.
Әне, анықтама беру қызметіндегі кезекші Гүлзира Палымбетова дауыс зорайтқыш арқылы бірінші жолға жолаушы пойызы келетінін хабарлап жатыр. Ал вокзал бастығының кезекші көмекшісі Бибігүл Сұлтанбайқызы күтіп алушы, шығарып салушы халықтың өтініш-тілегіне орай жұмысты үйлестіріп жүр. Пойыздан түсетін немесе мінетін жолаушылар арасында бөгде адамның көмегіне мұқтаж жолаушы болған жағдайда қажетті көмек көрсетуге лайықты жағдай қарастырылған. Карантиндік шектеу талаптарына сай бетперделі режим қатаң талап етіледі. Перизат Тасқынбаева мен Гүлайым Рахметова ғимараттың санитарлық, гигиеналық тазалығына жауапты болумен қатар олардың осы талаптарды қатаң сақтауын да назарда ұстайды.