Қазақ әйелінің қайсар болмысы
Шымкент қаласы бойынша меншікті тілшісі
Қазір мүмкіндіктер заманы. Сондықтан кез келген әйел заты өзіне сенімді болса, ең қиын деген мамандықты да меңгере алады. Бүгінде бизнес пен саясаттан бөлек, қаржыгер, ұшқыш, полицей, ірі жүк көлігін жүргізуші, теміржолдың қиын да күрделі саласын меңгерген әйелдер ешкімді де таң қалдырмайды.
«Қазақстан темір жолы» компаниясында ер азаматтармен қатар тер төгіп жүрген әйелдер үлесі қомақты. Біздің бүгінгі кейіпкеріміз – Шымкент жол бөлімшесіне қарасты Арыс жол дистанциясының жол монтері Бүбісара Тұрдықұлова. Кілең ер азаматтардан құралған ұжымда өзіне жүктелген міндетті еш ауырсынбай атқарып жүрген осынау қайратты жанның жолшының қайласын қолға ұстағанына 33 жыл болыпты.
– Қыз-келіншектерді жол монтері болуға ешқашан шақырмас едім. Өйткені бұл әйел адамға тән емес ауыр жұмыс. Оның үстіне бүгінгі таңда әйелдерді ауыр жұмыстан бостау жайлы үкіметтің арнайы қаулысына сәйкес, өндірісте әйелдер саны әлдеқайда азайған. Ал мен 1988 жылы жол монтері болып жұмысқа кіргенмін. Негізгі мамандығым – бухгалтер. Ол кезде өз мамандығыммен жұмыс табыла қоймады. Сосын тағдыр айдап жол саласына келдім. Қыстың суығына тоңып, жаздың аптап ыстығында күйіп, түзде жүріп осы кәсіптің барлық қиындығын бастан кештім. Кейін дистанция басшылығының жеңіл-желпі жұмысқа ауысу жайлы ұсынысын қабыл алмай, осы орнымда қалуды жөн көрдім. Жұмысқа үйреніп кеттім, ең бастысы үйренген ұжымым ұйымшыл, олармен бірге жұмыс істеген қызық, – дейді жол монтері.
Ұзақ жылғы адал еңбегі үшін Бүбісара Тыныштыққызы 2020 жылы 8 наурызда «ҚТЖ» ҰК» АҚ басшысының Алғыс хатымен марапатталды. Төрт баласын жалғыз өсіріп жеткізіп, аяқтан тұрғызған жесір ана – парасатты, қайратты да төзімді барша қазақ әйелдерінің жиынтық образы сынды.
«Жұмақ – ананың аяғының астында» деседі, ендеше қаһармандықтың жарқын үлгісі Бүбісара анамыз аман болсын!
