Теміржолшы Қарабековтер отбасы
Тараз қаласы бойынша меншікті тілші
Жамбыл өңірінде Қарабековтерді танымайтын жан жоқ. Теміржолшы Сағындық қарияның кіндігінен тараған перзенттерінің дені әке жолын жалғап, темір жолда еңбек етеді.
Ұлдың үлкені Жетпісбай Қарабековтің айтуынша, олардың алғашқы ұстазы – әкелері, зейнетке шыққан соң да балалары мен немерелерін теміржолшы кәсібінің қыр-сырын үйретуден жалықпайтын да, ерінбейтін де болыпты.
– Әкем осыдан он жыл бұрын 81 жасында дүниеден озды. Әбден өз ісіне берілген жан еді, шал болса да қозғалыс қауіпсіздігі бойынша нұсқаулықтарды жатқа соғатын. Басымыз қосылған жерде «анау қандай, мынау қандай?» деп бізден «емтихан» алып, қателесіп немесе мүдіріп жатсақ ұрсып, еске салып, білмесек үйретіп жататын. Біз таң қалатынбыз. Осының бәрін қалай жаттап алған деп. Ол кісі Жамбыл жол дистанциясында 41 жыл еңбек етті. Ал анамыз үйдің жайын жасап, бізді өсіріп, тәрбиемізбен айналысты. Ағайынды бесеуіміз әке жолын таңдадық. Мен әскерден келгенде әкем бір үйге бір жолшы жетер, сен машинист боласың деп мені Жамбылдағы машинистер дайындайтын мектепке алып барды. Сосын депоға кіріп алдымен көмекші машинист, кейін көп жыл машинист болдым. Әкем секілді мен де соңымнан ерген інілеріме жөн сілтеп, оларды да темір жолға тарттым, – дейді Жетпісбай Қарабеков.
Жетпісбай бүгінде Жамбыл вагон жөндеу депосында кәсіподақ цехының жетекшісі. Жетпісбайдан кейін Серік қалпына келтіру пойызында еңбек етеді. Өз саласының үздігі. Теміржолшылар күнінде төсбелгі алды. Берік Қарабеков Жамбыл жол дистанциясында жол шебері болып соңғы 20 жылдан бері еңбек етіп келеді. Ал Руслан Тараз локомотив жөндеу депосында, кенже ұл Рустам қалпына келтіру пойызында жұмыс істейді.
– Бүгінде немере буын да ата жолын жалғауда. Менің ұлым Жасұлан Жамбыл вагон жөндеу депосында вагон қараушы. Ал Беріктің ұлы Аслан «Қазфосфат» ЖШС теміржол паркінде вагон қараушы. Сонымен, әзірге ағайынды жетеуміз. Болашақта қатарымыз тағы да арта түспесе, кемімейтін шығар, ал әулетіміздің жалпы еңбек өтілі 170 жылдан асты, – дейді «Қозғалыс қауіпсіздігі үшін» төсбелгісінің иегері Жетпісбай Қарабеков.