Тағдыры теміржолмен түйіскен Бекмұрзаевтар әулеті Арыста тұрады
Түркістан облысы бойынша меншікті тілші
Шымкент жол бөлімшесіндегі ең ірі станциялардың бірі – Арыс станциясы. Орта Азияның қақпасы, тоғыз жолдың торабы атанған Арыс қаласында 10 адаммен жолықсаң соның 9-ы теміржол кәсібін нәсіп қылған болып шығады. Бүгінгі мақаламыздың арқауы арыстық Бекмұрзаевтар әулеті.
Арыс қаласы..... Мұнда күнделікті тіршілік пойыз дауысынан басталады. Күнделікті емесау, түнімен, тәулік бойы пойыздың болдаған дауысы мен станциядан шыққан дауыстар тынбай жаңғырып жатады. Арыс-1 станциясы 5 жолмен 1904 жылы «Орынбор-Ташкент» теміржолы құрылысымен қатар пайдалануға берілген. 2017 жылға дейін небәрі 9 жол болған. Қазіргі таңда өз міндеттерін жүйелі орындау үшін станцияда 106 жол, 8 парк тоқтаусыз жұмыс істеуде. Станцияның екі сұрыптау дөңесі бар. Оңтүстік бағыты 1937 жылы салынған, оның тәуліктік қуаты – 3640 вагон болса, Солтүстік бағыттағы автоматтандырылған сұрыптау дөңесі 1980 жылы салынып, тасымалдың азаюына байланысты 1995 жылдан бастап концервацияға қойылған.
Арыс станциясының бастығы Бөгенбай Тоқсейітов теміржолшы ата кәсібіне айналған арыстықтар даңқты династияларға бай, атадан балаға мирас болып, бірнеше ұрпаққа жалғасқан теміржолшылар әулеті станцияның мақтанышы дейді. Соның бірі жоғарыда айтып өткен Бекмұрзаевтар жанұясы.
Теміржолшы әулетінің шежіресімен бізді Арыс станциясына 36 жыл еңбегі сіңген Бекмұрзаев Еркін Баянбайұлы таныстырды. 1966 жылы 9-шы қарашада осы Арыста қарапайым теміржолшы отбасында дүниеге келген Еркін Баянбайұлы 1984 жылы мектепті бітіре сала Арыс қаласындағы вагон жөндеу депосына жұмысқа кіріпті. Екі жыл Отан алдындағы борышын өтеп келген соң Арыс станциясында вагон құрастырушының көмекшісі, 1989 жылдан бастап Арыс станциясының дөңес операторы, станция диспетчері, одан Дөңес кезекшісі болып осы кезге дейін еңбек етіп келеді.
Үлкен ұлы Ербол әке жолын қуған, қазіргі таңда Арыс вагон жөндеу депосында еңбек етеді. Кіші ұлы – Нұрбол инженер-технолог.
Өзінің қиын да қызықты жұмысын тілге тиек еткен Еркін ағамыз теміржолшы әулеттен шыққан 17 адамды санап шықты. Бекмұрзаұлы Сайрамбай, Бекмұрзаұлы Әміреше, Есмұрзаұлы Иса, Есмұрзаұлы Сейдеш, Бекмұрзаұлы Әбіл, Бекмұрзев Баянбай, Бекмұрзаев Сайлаубай, Бекмурзаев Орынбасар, Арыстанбаев Ырысбай, Бекмурзаев Серік, Бекмурзаев Ізбасар деп бір қайрырып алып, әрі қарай әулеттегі кейінгі толқынға ауысты.
Бекмұрзаев Сабыр Сайлауұлы, Арыс станциясында пойыз жылдамдығын реттеуші. Бекмұрзаев Нұралы Баянбайұлы мен Бекмұрзаев Бегалы Баянбайұлы Вагон депосында еңбек етеді.
Бекмұрзаев Ералы Баянбайұлы, ШЧ-38-де вагоншы, Бекмұрзаев Жарылқасын Сайлауұлы, ПЧ-да жолшы. «18-шісі менің ұлым Ербол!» деді әулеті үшін, кәсібі үшін мақтанышын жасырмаған теміржолшы.
Жуырда отбасы күні қарсаңында өтетін «Мерейлі отбасы» байқауына қатысуға шақырту алған отбасы тек қана арыстық емес, күллі Қазақстан теміржолшыларының мерейін өсірмек.