Еңбек майданында шыңдалған теміржолшы

ҚТЖ келбеті
06.05.2023, 12:08
Сурет архивтен
Қосұйым Мұқашев

Атырау облысы бойынша меншікті тілші

Бар саналы ғұмырын ел экономикасының күретамыры – теміржол саласына сарп еткен Олжабай Татимов есімі Атырау өңірінің Жылыой мен Мақат, Бейнеу аудандарының теміржолшыларына жақсы таныс.

1926 жылы Жылыой өңірінің қазіргі Қара-Арна ауылдық округінде дүниеге келген Олжабайдың балалық шағы Голощекиннің қолдан жасалған ашаршылығы мен Сталиннің репрессиясы орнатқан зұлмат заманға, ал жастық шағы сұрапыл соғыс жылдарына тап келді. Неміс басқыншылары елімізге тұтқиылдан лап қойғанда Олжабай Татимов 15 жасар жасөспірім еді. Отан қорғау үшін қан майданға аттанған әкелері мен ағаларының орнын жоқтатпай тылдағы еңбек майданына араласқан бозбала «Бәрі де Жеңіс үшін, бәрі де майдан үшін» ұранымен уақытпен санаспай, таңның атысы, күннің батысы аянбай еңбек етеді. Сол кезде майданды азықпен қамтамасыз ету үшін және жау оккупациясынан зардап шегіп, әл-ауқаты әбден әлсіреген бауырлас республикаларға көмек көрсету мақсатында колхозшылар КСРО-ның батыс өлкесіне төрт түлік мал жеткізіп, үлкен көмек көрсеткені белгілі. Бұғанасы қатпаған жасөспірім Олжабай Татимов, міне, сол тарихи оқиғаның бел ортасында жүрді. Ол колхозшылармен бірге айшылық алыс жолдарды артқа тастап мал айдады. Тылдағы еңбек майданында ерлікке пара-пар ісімен Жеңіс сағатын жақындатуға үлес қосты.  

1944 жылдың желтоқсанында әскер қатарына шақырылып, сарбаздар сапына қосылады. Бұл уақыт – кеңес әскері Еуропаны фашизмнен азат етіп, жауды тықсыра қуып бара жатқан кез. Қатардағы жауынгер Олжабай Татимовке немістермен бетпе-бет шайқасудың сәті түспеді. «Жау жағадан алғанда, бөрі етектен тартады» дегендей, бұл уақыт онсызда соғыстан титықтаған елді өз ішімізден шыққан ұры-қарылар аш бөрідей талап, «жығылған үстіне жұдырықтап» жатқан кез еді. Жылыойлық жас жігіттің күш-қайраты, міне, осындай сын сәтте мемлекеттің ішкі тәртібін нығайтуға жұмсалды. Ресейдің Красноярск аймағында әскери қызметте болып, елдің ішкі тәртібін күзетті.  

1947 жылдың күзінде Отан алдындағы азаматтық борышын өтеп, елге аман-сау оралған Олжабай Татимов бейбіт өмірдегі еңбекке араласады. Теміржолшы мамандар даярлайтын училищенің қысқа мерзімдік курсын оқып бітірген жас жігіт ауданның теміржол саласына жұмысқа қабылданады. «Қатырма қағазы» бар жас жігітті басшылар бірден бригадир етіп қызметке алады. 1960 жылдарға дейін «Жылыой» деп аталған мұнайлы ауданның аумағында соғыс жылдары Мақат пен Қосшағылдай қара алтынды қос кәсіпшіліктің арасын жалғайтын тар табанды теміржол телімі тартылған еді. Оның құрылысы стратегиялық тұрғыдан өте маңызды болды. Өйткені осы күретамыр арқылы Құлсары мен Қосшағыл мұнайы Отан қоймасына жол тартатын. Олжекең осы өндіріс ошағында жолшылардың бригадирі болып, болат жолдың қауіпсіздігін қамтамасыз етуге күш салады. Шын мәнінде, тар табанды деген аты болмаса, сол кездегі темір жол ел экономикасы үшін аса маңызды рөл атқарады. 1966 жылдан бастап Құлсары станциясы іске қосылып, теміржол мекемелері пайда болғаннан кейін Олжабай Татимов сол кездегі жаңадан құрылған жол дистанциясына жұмысқа ауысады. Осы салада 15 жылдан астам тәжірибесі бар дайын теміржолшы маманды жол мекемесінің басшылары қуана қарсы алады. Болат жол бойының қыр-сырын бес саусақтай білетін маман дистанцияда аға шебер, бригадир болып зейнетке шыққанша абыройлы еңбек етеді.  

– ПЧ-15 аталған Құлсары жол дистанциясындағы ең үздік бригада Олжекеңнің бригадасы болды. Жылма-жыл ауыспалы Қызыл Туды жеңіп алып отырды, 1986-1987 жылы зейнеткерлікке шыққанша ұстап тұрды. Осындай еңбегінің арқасында «Үздік жолшы» атанып, бізге үйреткен өнегесі зор болды, – дейді бүгінде зейнеткер шәкіртінің бірі Мырзабай Мұқанов.  

Олжабай Татимовқа 1985 жылы сол кездегі Байланыс жолдары министрлігінің арнайы бұйрығымен «І класты бригадир» атағы беріліп, есімі Құрмет тақтасына жазылады.  

 

Жаңалықтар
08.10.2025
Алты станцияда дауыстап хабарлау жүйесі енгізілді
Аймақтар
08.10.2025
Кәсіподақ – еңбек адамының сенімді тірегі
Әлемде
08.10.2025
Иран теміржолдары қысқа мерзімді жобаларға басымдық беріп отыр
Жаңалықтар
08.10.2025
«Жас үздік маман» байқауы өтіп жатыр
Жаңалықтар
08.10.2025
Жолаушылар пойыздарында 500-ден астам тәртіп бұзушы анықталды
Инфрақұрылым
08.10.2025
Тоқаев түркі мемлекеттерін Орта дәліз бойындағы инфрақұрылымды жаңғыртуға шақырды
Әлеумет
08.10.2025
Қазыналы қарттарға – құрмет пен тағзым
Әлеумет
07.10.2025
Астана жол дистанциясы ғимаратында жөндеу жұмыстары жүргізілді
Жолаушылар тасымалы
07.10.2025
«Астана - Орал» бағытында жаңа вагондар қатынай бастады
Жолаушылар тасымалы
07.10.2025
Stadler Kazakhstan вагондары 10 мың шақырымдық сынақтан өтті
Цифрландыру
07.10.2025
Пойыздарды интернетпен қамтамасыз ету жұмыстары жалғасуда
Жүк тасымалы
07.10.2025
Вагон айналымында іркіліс жоқ
Қауіпсіздік
07.10.2025
Қызылорда теміржолында күзгі комиссиялық тексеру өтті
Инфрақұрылым
07.10.2025
Ақсу вокзалы жаңартылып жатыр
Қауіпсіздік
07.10.2025
Өрт сөндіру пойызының дайындығы пысықталды
Жаңалықтар
07.10.2025
Теміржолшылар «Таза Қазақстан» акциясы аясында 500-ден астам ағаш отырғызды
Аймақтар
07.10.2025
Қағаз мұрағаттан цифрлық платформаға дейін
Жаңалықтар / Мұрағат
07.10.2025
Қазақстан теміржолшысы газеті, №82 07 қазан 2025 жыл
Жаңалықтар
06.10.2025
Достық – Мойынты учаскесінің екінші жолдары тасымал процесіне тартылды
Жүк тасымалы / Апта саны
06.10.2025
Еліміздің темір жолымен 28 млн тоннадан астам көмір тасымалданды