Ерлікпен пара-пар еңбек
Атырау облысы бойынша меншікті тілші
Темір жол саласында қашан да қайнаған еңбек. Станцияларға бірі келіп, бірі кетіп жатқан пойыздарды қабылдап-жөнелтіп отыратын станция кезекшілері мен операторлар, диспетчерлер қызметінен бөлек алуан түрлі жүк тиелген құрамдарды ағытып-жалғап, сұрыптап отыратын пойыз құрастырушылар еңбегі нағыз ерлік.
Жыл он екі ай қандай ауа-райы болса да түзде жүретін осы бір кәсіп иелерінің жұмысы қауіпті де қатал. Биыл өңірде ауа райы аса қолайсыз болып тұр, шілденің басында ауа температурасы 40-тан асып, кей жерлерде 50-ге дейін барды. Міне, осындай қатты ыстықта шыжыған күн астында, қызып тұрған вагондармен жұмыс істейтын пойыз құрастырушылар еңбегі ерлікке пара-пар.
Дәулет Пұсырмановтың Ақжайық станциясында пойыз құрастырушы болып істеп жүргеніне екі жыл. Ол М.Тынышпаев атындағы ҚазККА жоғары оқу орнын бітірген. Жолдамамен Атырауда еңбек етіп жүр.
– Туған жерім Қызылорда облысы, жолдамамен осында келдім. Жұмысым жақсы, өзіме ұнайды. Жұмыс қиын, ауа-райына қарамаймыз. Бірақ ыстыққа да, суыққа да үйрендік. Ұнатқан мамандығыңның ауырлығы болмайтын сияқты. Қатты қиналып бара жатсаң, не денсаулығы кеміп, жайың болмай тұрса, демалуға рұқсат. Өз қауіпсіздігіңді ойлауға ешкім тыйым салмайды, қайта еңбек шартында оған рұқсат берілген, – дейді ол.
Пойыз құрастырушылардың жалақысы соңғы жылы айтарлықтай өскен. Станция басында ыстық-суық суы бар душ, тамақ ішетін орын да бар. 12 сағат жұмыс уақыты белгіленген. Осы мерзімде екі аяққа тыным жоқ. Станцияға күніне жүз шақты вагон келеді, соларды маневрлік тепловозбен бірге ағытып-жалғау, сұрыптау керек. Арнайы киіммен жүз пайыз қамтылған. «Ол жағынан проблема жоқ. Мысалы, аяқ киімің жыртылып қалса, тез жаңасын береді. Үстіміздегі киім де солай. Алаңсыз жұмыс жағдай жасалып отыр. Тек қауіпсіздікті сақтап, жұмысыңа жауапкершілікпен қарасаң болды» дейді Дәулет. 40 жыл еңбек өтілі бар Атырау станциясының пойыз құрастырушысы Рахымбердиев Жамбылдың ұстазы сынды. «Қозғалыс қауіпсіздігін қамтамасыз ету үшін теміржолшы үшін қолайсыз немесе ауа райы деген болмайды, кез-келген уақытта дайынбыз. Жазда күннің ыстығына, қыста суығына үйренгенбіз» дейді кәнігі теміржолшы.