Жолшылар әулетінің үшінші буыны

Шымкент темір жолының Темір станциясында қырық жылдан бері темір жолдың «отымен кіріп, күлімен шығып» келе жатқан темірдей төзімді теміржолшы тұрады. Ол – Арыс жол дистанциясының 2-ші телім бастығы Рамат Бердібек Жұпарбекұлы.

Осы Темір станциясында 1965 жылы теміржолшының отбасында дүниеге келген кейіпкеріміздің болашақ кәсібі тумай жатып маңдайына жазылған секілді көрінеді. Өйткені теміржолшының баласы теміржолшы болуы – жазылмаған заңдылық сияқты. Теміржол институтын «инженер-жолшы» мамандығына оқып жоғары білім алған соң еңбек жолын қатардағы жолшы болып бастап сатылай көтерілген. 1993 жылы әкесі Жұпарбек зейнетке шығып, орнына жол шебері болып тағайындалды. Сосын аға жол шебері болды. Түркістан жол дистанциясы бастығының орынбасары болып 9 жыл жұмыс істеді. 2011 жылы Түркістан жол дистанциясы мен Арыс жол дистанциясы қосылып ірілендірілген соң қайта құрылған Арыс жол дистанциясына «аға жол шебері» болып тағайындалды. Бүгінде Арыс пен Түркістанның ортасындағы Темір станциясында Арыс жол дистанциясының 2-ші телім бастығы қызметін абыроймен атқарып келеді.  

Бердібек Жұпарбекұлынан «аға теміржолшы кім?» деп сұрадық. 

«Теміржолшы – мойнына орасан зор жауапкершілік алған әмбебеп маман. Сырт көзге жолшы да, машинист те, вагон қараушы, диспетчер – бәрі теміржолшы, сондықтан жалпылама ол әмбебеп кәсіп иесі. Бірақ олардың бәрі қосылып бір миссияны атқарады, ол – жүк және жолаушы тасымалдау жұмысы. Бізді кәсібіміздің шыңына шығып мақтау да, даттау да осы жұмысымыздың нәтижесіне байланысты», – деп сыр шертті «Адал еңбегі үшін» төсбелгісінің иегері, темірлік теміржолшы.  

Рамат Бердібек – теміржолшылар әулетінің үшінші буыны, атасы Рамат та өмір бойы жолшы болған, әкесі Жұпарбек те 1958 жылдан бастап жол жөндеуші, бригадир, жол шебері, аға жол шебері болған, «Құрметті теміржолшы» атанған, екеуі де ауыл-елге абыройлы азаматтар болыпты. Ал өз жолын үлкен ұлы Сырым жалғастырып, Арыс белгі беру және байланыс дистанциясында механик болып еңбек етуде.