Жаңа жылды жұмыста қарсы алатындар (Фото)
"Қазақстан теміржолшысы" газетінің тілшісі
Жаңа жылды отбасылық мейрам деп жатамыз. Өйткені көпшілік бұл күні өз шаңырағында дастархан жайып, ақжарма тілектерін айтып, жақындарымен бірге болуды қалайды. Дегенмен, қызметіне байланысты жаңа жыл түні жұмысқа шығып, ел үшін еңбек ететіндер бар. Сондай жандардың бірі біздің теміржолшылар.
Экономиканың күре тамыры саналатын теміржол саласы күні-түні үздіксіз қызмет етеді. Жаңа жылда пойыз тоқтамайды, сондықтан машинистер, жолсеріктер, станция, вокзал мен басқа да құрылымдар жұмыс істейді.
Жаңа жылды жұмыста қарсы алғалы отырған жандардың бірі Оңғалбек Әбішев. Ол «ҚТЖ» ҰҚ» АҚ-ның Тасымалдауды басқарудың автоматтандырылған орталығында аға дистпетчер.
О.Әбішев пойыздардың жүріп-тұруын қашықтан бақылап отырады. Айтуынша, қазір Жамбыл бөлімшесінің жолаушылар мен жүк тасымалын бақылайды. Теміржолшы бұған дейін жаңа жылды бірнеше рет жұмыста өткізген.
«Өзім 1995 жылдан бері теміржолда жұмыс істеп келемін. ТБАО-да 2009 жылдан бері жұмыс істеп жатырмын. Теміржолда темірдей тәртіп болу керек. Жұрттар демалып жатқанда, теміржолшылар жұмыс істей береді. Жолаушы, жүк пойыздары бар, диспетчерлер бәрі жұмыс істей береді. Осы теміржолда істеген 28 жылда 7-8 рет жаңа жыл түні жұмысқа шықтым. Ол солай қалыптасқан тәртіп, демалмай қалдым деп қапа болмаймын. Кезекшілігің қалай келеді, солай жұмысқа шығасың. Отбасым да оған түсіністікпен қарайды. Бәрі үйренген. Қазір екі ұлым да теміржолда қызмет етіп жатыр, олар бәрін түсінеді», - дейді кейіпкеріміз.
Теміржолшы жаңа жыл түні мейрамды жұмыстағы әріптестерімен 10-15 минутта атап өтетінін айтады. Бір-біріне тілектерін айтып, ары қарай жұмыстарын жалғастыра береді.
Тасымалдауды басқарудың автоматтандырылған орталығында Оңғалбек Әбішев сияқты 15-ке жуық диспетчер бар. Әрқайсысы әр бағыт бойынша жұмыс істейді. Кешкі ауысымда жұмыс істейтіндер сағат 21:00-ден таңғы 09:00-ге дейін шығады.
Дичпетчерлер станцияға қандай пойыз келе жатқаны жайлы алдын ала хабар беріп, оларға жол дайындауға нұсқаулық береді. Егер жолда бірдеңе дұрыс болмаса станцияға қоңырау шалып, байланысқа шығады.
Сөз соңында Оңғалбек Әбішев барлық теміржолшыларды жаңа жыл мейрамымен құттықтап, мол табыс тіледі!
