Халықаралық пойыз бастығы
«Қазақстан теміржолшысы» газетінің тілшісі
«Жолаушылар тасымалы» АҚ қарасты «Алматы-Қазан» халықаралық пойыздың бастығы Дәулет Сәрсенбаевтың теміржолдағы еңбек өтілі 20 жылдан асады. Шетелге қатынайтын жолаушылар тасымалына қызмет көрсетудің жауапкершілігі зор екенін ескерсек, соңғы 4 жылдан бері пойыз бастығы лауазымын атқарып келе жатқан кейіпкеріміздің жұмысы тіпті де оңай емес.
Әулетінде жолшылар мен жолсеріктер көп болыпты. Сол алдыңғы буын ағаларына еліктеп өскен Дәулет салада жоғары білім алған соң еңбек жолын «Алматы-Қостанай» бағытындағы жолаушы пойызында жолсерік болып бастаған. Әрі қарай ел ішіндегі бағдарлардың басым бөлігінде жолсерік болды, халықаралық пойызбен Мәскеуге, Новосібірге қатынады. 2019 жылдан бері Қазан қаласына қатынайтын пойыз бастығы болып, бүкіл құрамның қауіпсіздігі мен тәртібіне жауапты болып келеді.
– Жолда түрлі жағдай болуы мүмкін. Оның үстіне шекарадан өткенде кедендік және т.б. тексерулер көп болады. Сол кезде жолаушыларға түсіндіріп, түсіністікпен қарауға шақырамыз. Жолаушылар арасында ішімдік ішкендер болса немесе жанжал тудыруға бейім адамдар болса, оларды тыныштандырып, тәртіпке бағындыруға тырысамыз. Жұмыс ауысыммен, бір апта біздің бригада шықса, келесі апта басқа бригада шығады. Біздің жылжымалы құрамда 6 вагон бар, соған сәйкес 12 жолсерік вагондарға жауапты. Бұл бағытта қазақстандықтар көбіне Қазан туристік қала болғандықтан демалып қайту үшін пойызға отырады, саяхатшылардың көбі егде жастағылар. Сосын біз үстінен өтетін Екатеринбург және межелі нүкте Қазан қаласындағы ЖОО-да оқитын студенттер де көп мінеді, – дейді пойыз бастығы.
Бұл бағыттағы пойыз жолсеріктер қауіпсіз де мінсіз сервисті қамтамасыз еткені үшін жолаушылар тарапынан алғысты жиі алады екен. Дәулет Сәрсенбаевтың өзі – көп балалы әке, бес баласының анасымен де жолсерік болып жүргенде танысып, отбасын құрған. Бақытты әке, тәжірибелі маман өмірдегі екі маңызды мәселе – жар мен мамандық таңдауда адаспағанын айтады. Бала күнгі арманы оны жолаушылар тасымалына әкелсе, осы жұмысының арқасында өмірлік жарын да кездестіргенін тағдырдың тамаша сыйы деп санайды.