Донор күні теміржолшы жігіт марапатқа ие болды
Маңғыстау облысы бойынша меншікті тілші
«Құрық порты» ЖШС Бас директоры Серік Ахметов соңғы он жыл бойы тұрақты донор ретінде қан тапсырып жүр. Денсаулық сақтау саласына қосқан үлесі үшін жақында өткен донор күні теміржолшы жігіт марапатқа ие болды.
Аталған марапат дүниежүзілік донор күніне орай облыстық қан орталығы «Донор күніне 20 жыл: донорларға алғыс айтамыз» ұранымен өткізген іс-шара барысында табыс етілді. Онда ұйымдастырушылар «Құрық порты» ЖШС басшысына халық денсаулығын нығайту бағытындағы игілікті іске белсенді атсалысып, кейбір науқастардың өміріне ауадай қажет дүние – қан тапсырып, өзгелерге үлгі болып жүргені үшін ризашылығын білдіріп, Алғыс хат табыстады.
– Халықтың тұрақты қан тапсыруға кеңінен қатысуы – әрбір адамның қажет болған жағдайда қанға қол жеткізуінің кепілі бола алады, денсаулығыңды нығайтумен қатар бұл өте сауапты іс, – деген Серік Ахметов алдағы уақытта да бұл игілікті істі жалғастыра беретінін жеткізді.
Дүниежүзілік қан доноры күнінің 20 жылдық мерейтойы – бүкіл әлемдегі қан донорларына жылдар бойы өмірлерді сақтап қалуға қосқан үлестері үшін алғыс білдірудің және донорлықтың пациенттер мен барлық адамдар үшін маңыздылығын бағалаудың тамаша мумкіндігі дейді ұйымдастырушылар.