Локомотив қызметінде – қырық жыл

«ҚТЖ-Жүк тасымалы» ЖШС локомотив пайдалану департаментінің бас менеджері, Құрметті теміржолшы Серік Әбеновті әріптестері күні кеше зейнет демалысына шығарып салды.

Салтанатты басқосуда кейіпкерімізді «ҚТЖ-Жүк тасымалы» ЖШС басшылығы атынан бас директордың корпоративтік мәселелер жөніндегі орынбасары Владимир Бабиченко бастаған әріптестері құттықтап, Компания басшылығы атынан арнайы адресат табысталды. Жүк тасымалы кәсіподақ ұйымының төрағасы Ермек Төлегенов те сөз алып, Серік Қоқашұлымен иық тіресе, көп жылдар бірге жұмыс істегендерін, оның жауапкершілігі жоғары, өз ісіне тиянақты, білгір де білікті маман ретінде танылғанын атап өтті. Ол сондай-ақ «су жаңа» зейнеткерге дәстүрлі шапан жабудың орнына қазіргі заман талабына сай ақылды сағат тарту етті. ҚТЖ-ЖТ-ның атқарушы директоры – вагон шаруашылығы департаментінің директоры Қайраткен Нығметов те жылы лебізін жеткізіп, күрделі немесе қиын кезеңде Серік Әбеновтің жедел әрі оңтайлы шешім таба білген басты қасиетін айтып, бұл біліктілік пен білім оның шекпенінен шыққан шәкірттерінің бойынан да табылатынына сенім білдірді.  

Серік Әбенов Целиноград қаласында 1960 жылы 31 шілдеде дүниеге келіп, мектептен кейін туған қаласындағы теміржол техникумына тепловоз шаруашылығы мамандығына оқуға түседі. Еңбек жолын Павлодар локомотив депосында слесарь болып бастапты. Бір жылдан соң Ресейдің Арханьгелск облысында Отан алдындағы борышын өтеуге аттанып, онда да теміржол әскери бөліміне түсіп, алты ай машинистер мектебінде білім алады. Одан әрі «Капустин Яр» ракета полигонында әскери борышын өтейді. Елге оралған соң Целиноград локомотив депосына жұмысқа тұрып, тепловоз, кейін электровоз машинисінің көмекшісі болады. Өз ісінің үздігі болуға талаптанған жас маманның өршіл мақсаты бар еді. Ал оған жету үшін техникумдық білім аздық етері анық. Сондықтан ол практикалық еңбегін жоғары біліммен толықтыру мақсатында Алматы теміржол көлігі инженерлері институтына сырттай оқуға түседі. Жоғары білім алған соң инженер-технолог, Ақмола бөлімшесінде пойыз диспетчері, аға диспетчер, теміржолдың статистика қызметінде ревизор, кейін «Локомотив» АҚ бөлім бастығынан басқарма бастығының орынбасары қызметтерінде, бүгінгі күнге дейін «ҚТЖ-Жүк тасымалы» ЖШСда локомотив шаруашылығын пайдалану департаментінде бас менеджер болды.  

«Мен теміржолда жарты ғасырға жуық уақыт жұмыс істедім. Жиырмаға толмаған жас жігіт болып келіп, енді міне, шашымды ақ шалған ел ағасы болып зейнетке шығып жатырмын. Локомотив шаруашылығының өсіп-өркендеу кезеңдерінің куәгері де болдым. Тәуелсіздік алған кезде бізге кеңестік дәуірден мұра болып қалған ескі-құсқы локомотивтерді керегімізге барынша жөндеп-жасқап, жаратып келдік. Қазір жағдай көш ілгері. Өз еліміздің өндірісінен шығатын жаңа тепловоздар, электровоздармен паркіміз толығып, жаңарып жатыр. Бұл заманауи локомотивтер автоматтандырылған, цифрлық басқарумен жүргізіледі. Локомотив бригадалары үшін барлық қолайлы жағдай жасалған», – деген Серік Қоқашұлы басшылық пен әріптестері тарапынан көрсетіліп жатқан сый-құрметке алғысын білдірді.