Машинист мәртебесі
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесінің Жамбыл локомотив пайдалану депосында 35 жылдан астам уақыт еңбек етіп, темір тұлпарды тізгіндеп келе жатқан Ерлік Олжабаев биылғы теміржолшылардың кәсіби мерекесіне орай беделді марапатқа ие болып отыр.
Жүз жылдық тарихы бар байырғы депоның машинисі бұл марапатқа әдбен лайық. Табандылық пен тұрақтылық – оның басты қасиеттерінің бірі. Қай істе де төзімділік танытатын ол мұндай мінез теміржолға келген соң қалыптасқанын айтады.
– Шыдамсыз адамдар теміржол саласында ұзақ уақыт еңбек ете алмайды. Мысалы, мұғалім немесе дәрігер болатын адам болмысынан белгілі ғой. Олардың бойында мамандықтарына қарай қажетті қасиеттер қалыптасады. Сол сияқты машинистер де жаратылысынан төзімді келеді. Алыс жолға шыққан жанға керек мінез, – дейді Ерлік Білдібайұлы.
Ол 1985 жылы тепловоз машинисінің көмекшісі болып алғашқы сапарға шыққан кезінен бастап теміржолшыға керек қасиетті дұрыс аңғарып, өзін қалыптастыра білген екен. Әріптестері де оның көп сөзге жоқ екенін, істің адамы екенін айтады.
– Қазір жағдайды осыдан 20-30 жыл бұрынғымен салыстыра алмайсыз. Жылдан жылға тасымалдау процесі жақсарып келеді. Бүгінгі тепловоздар мен электровоздар қуаты жоғары, соған орай еңбек өнімділігі де артқан. Жамбыл локомотив пайдалану депосының паркінде заманауи магистральдық және маневрлік тепловоздар, электровоздар бар. Менің 2-класты тепловоз машинисі біліктілігім бар. 20 жыл бұрын теміржол көлігін дамытуға қосқан жеке үлесім үшін «Қазақстан темір жолына –100 жыл» мерейтойлық медальмен марапатталғанмын. Биыл Қазақстан теміржолына – 120, Жамбыл локомотив пайдалану депосының құрылғанына 100 жыл толған мерейлі жылда да мәртебелі марапатқа ие болып отырмын, – дейді Ерлік Олжабаев.
1990 жылдан бастап тепловоз машинисі болып тізгінді қолға алған соң, өзіне артылған жауапкершілік жүгі екі еселене түскенін айқын түсінген. Сондықтан жүктелген міндетті мінсіз атқаруға тырысып келеді. Мақтау үшін емес, ел-жұрттың алғысын алу үшін еңбек етті. Ал марапат – ол машинистің мәртебесін арттыра түсетін кезекті абырой биігі, ынталандыру болмақ.