Елордада өткен екі күн

Әйелдер мерекесі қарсаңында еліміздің әр түкпірінен елордаға арнайы шақырту алған нәзік жандар қатарында Атырау вокзалының электромеханигі Динара Жұмағалиева да болды.  

Атырау магистральдық желі бөлімшесіне қарасты вокзал қызметкері  естен кетпес екі күн сыйлаған Астана сапарына дән риза. «ҚТЖ» ҰК» АҚ Басқарма төрағасы Нұрлан Сауранбаевтың қабылдауында болып,  «Кәсібі бойынша үздік» төсбелгісін кеудесіне тағып қайтты.  

– Астана сапарын асыға күткеніме орай өте әсерлі болды. Өңірлерден келген қонақтарды ЦЖС қызметкерлері қарсы алып, қонақүйге орналастырды. Орталық мұражай, Байтерек, т,б қаланың көрікті жерлерін аралатып, кешке ауызашарға шақырды. Ертеңіне дирекция басшысы С.Рахметовтің қатысуымен дөңгелек үстел болып, онда дирекция бойынша атқарылып жатқан жұмыстар, жобалар жайы сөз болды. Түрлі сый-сияпат жасалып, «Теміржолшы әйелдер қауымдастығы» медальоны берілді. Содан соң «ҚТЖ» ҰК» АҚ басқарма төрағасы Н.Сауранбаев қабылдап, мерекемен құттықтады. Әр өңірден келген қыз-келіншектерге отбасында амандық, еңбекте жеміс тілеп, марапаттар табыс етті, – дейді Динара.  

Динараның жолдасы Жарасқан да теміржолшы. Екеуі 5 бала тәрбиелеп, өсіріп отырған жас отбасы. Динара Агро колледж пен Х.Досмұхамбетов атындағы Атырау университетін экономика мамандығы бойынша бітірген. Бүгінде Атырау вокзалының электронды табло, компьютер құралдары, т.б. цифровизация бағытындағы жұмыстарға жауапты. «КТЖ басшылығының теміржолшы әйелдер қауымын Елорда төріне шақырып, ерекше көңіл бөлгеніне ризашылығымды білдіремін. Тіршілік пен берекенің бастауы – Аналар аман болсын, ұрпақ өсіп-өне берсін. Бақытты ел болайық!», – дейді ол.