Теміржолға адал қызмет

Ұзақ жыл темір жол саласында үздіксіз қызмет етіп келе жатқан қарапайым мамандар еліміздің түкпір-түкпірінде жеткілікті. Солардың бірі – Қызылорда облысы Арал ауданы Сексеуіл пайдалану локомотив депосының 1-санатты машинисі Әскербек Жанғазиев Сағитжанұлы. Ол табан аудармай қызмет еткен жылдар ішінде  біліктілігі мен кәсіби шеберлігінің арқасында ұжымға сыйлы болды.  

Бірінші санаттағы машинист темір жолдың дамуына, ел экономикасының күре тамыры болып табылатын саланың өркендеуіне елеулі үлес қосып келеді. Еңбек жолын 2005 жылы Сексеуіл пайдалану локомотив депосында шаруашылық цехының қарапайым жұмысшысы болып бастаған. 2006 жылы машинист көмекшісі болып тағайындалып, Сексеуіл-Қазалы телімінде жүк құрамын тасымалдайды. Біліктілігі артып, «тепловоз басқарсам» деген оймен Әскербек 2010 жылы Ақтөбе өңірлік машинист даярлау курсын жақсы нәтижемен аяқтайды. Сөйтіп Сексеуіл пайдалану локомотив депосында 2012 жылдан бастап машинист қызметін атқарып келеді.

 Қажырлы еңбегінің арқасында қозғалыс қауіпсіздігін сақтап, адал еңбек атқарып жүрген үлгілі машинист Сексеуіл-Шалқар телімінде жолаушылар тасымалы, Сексеуіл-Қандыағаш, Сексеуіл-Ақтөбе телімдерінде «Тұлпар Тальго» жүрдек жолаушылар тасымалы бойынша тепловоз тізгіндеп келеді.  

«Жолаушыларды жылдың қай мезгілі болса да, ауа-райының қолайсыздығына қарамастан межелі жерге қауіпсіз жеткізуді басты борышым деп санаймын. Себебі бұл атадан әкеге, әкеден маған дарыған қасиет десем артық болмас. Атам Өтепберген кезінде теміржолшы, яғни вагон кондукторы болған, ал әкем, менің мақтанышым Сағитжан Жанғазиев ұзақ жылдар бойы Сексеуіл депосында машинист болып мінсіз қызмет атқарған. Сол үшін 1985 жылы «Құрметті теміржолшы» атағын алған, солардың ізін жалғап теміржолшылар әулетінің кәсібін мирас етіп келе жатқанымды мақтаныш етемін», -  дейді ол.

 Қазір Әскербек құдай қосқан жан жары Ұлболсын екеуі 3 қыз, 2 ер бала тәрбиелеп отыр. Көпке үлгілі болған отбасының отағасы болашақта ұлдары ата жолын қуып, теміржолшы болса деген тілегін де жеткізді.