Шоқпардан шыққан теміржолшы

Жуырда 70 жылдық мерейтойын қарсы алған сала ардагері Анарбек Рсымбетов табысты еңбек жетістігіне құрылған өткен өмірімен ғана емес, абыройлы атымен, берік отбасымен, теміржолда тапқан әріптес-достарымен де мақтана алады.

Жамбыл облысы Шу ауданындағы шағын разъезде дүниеге келген Анарбек Жаханұлының атасы мен әкесі Алаайғыр разъезінде жолшы болған екен. Бұл жер – Түрксіб құрылысшылары үлкен қиындықпен еңсерген әйгілі Шоқпар асуымен танымал. Шоқпарда орта мектеп бітірген Анарбек екі жыл әскерде болып, келген соң алысқа ұзамай атасы мен әкесінің ізімен Шоқпар жол дистанциясына монтер болып жұмысқа орналасты. Жас жігітке бұл институт алдындағы тәжірибе мектебі болғаны анық, ол жол бойындағы күрделі және ағымдағы жөндеу, жоспарлыескерту жұмыстарына белсене араласып, жолшылардың өзімен бірге алып жүруге тура келетін ауыр құралдарын да қыңқ етпей тасымалдап, күн сайын бірнеше шақырым жаяу жүріп әбден шыңдалады.  

Институтты бітіргеннен кейін Анарбек еш қиналмай бірден Алматы жол дистанциясында алдымен бригадир, кейін жол шебері болып жұмыс істейді. 1985 жылы Бурундай учаскесіне ауысып, жиырмадан астам бағыттамалық бұрмалары бар күрделі учаскеге басшылық етті. Жол шебері Рсымбетов өзінің барлық күш-жігерін, білімін сеніп тапсырылған телімде жолды күтіп ұстау және еңбекті қорғау бойынша үлгілі етуге ұмтылды.  

Арада бірнеше жыл өткен соң Анарбек Жақанұлы Алматы жол басқармасының жол қызметіне шақырылады. Пайдалану бөлімі бастығының орынбасары болып жолдардың жай-күйін тексеру, жөндеу, техникалық құжаттаманы жүргізу, жол өлшеуіш вагондардың жұмысы, т.т. арысы Түркістан, берісі Защитаға дейін шарлап, талай жыл жемісті еңбек етті.  

Ол өзінің тәлімгері Мұңайтпас Мұсаевты жылы лебізбен еске алады. Дәл осы Мұсаев Анарбекті өрт сөндіру қызметіне шақырып, сол салада инспектор болып бастады. Кейін бұл құрылым әскерилендірілген күзеттің бір бөлігі болды, ал қайта құру нәтижесінде ӘТЖК-ден бөлініп, дербес құрылымға айналды. Көптеген жылдар бойы Анарбек Жақанұлы өрт сөндіру қызметінде тер төгіп, алдымен орынбасар болды, ал 2007 жылдан зейнетке шыққанша басқарды.  

«Адал еңбегі үшін» төсбелгісімен, атаулы сағатпен марапатталған кейіпкеріміздің есімі магистральдің Құрмет кітабына енген. Сонымен қатар, «Түрксіб-90», «Қазақстан темір жолына – 120 жыл», «Мойынты-Шу– 70 жыл», т.т. мерейтойлық медальдардың иегері.