Қауіпсіздік мәдениетін қалыптастырған инженер

Атбасар жол дистанциясының қауіпсіздік техникасы және еңбек қорғау бойынша жетекші инженер Марат Ғафуров – туған жердің теміржолын түлетіп келе жатқан маман. Көп балалы отбасында дүниеге келген оның ата-анасы теміржолшылар болғандықтан өзі де болат жолға бет бұрды.

Марат Хайбрахманұлының әкесі вагон депосында слесарь болса, анасы теміржолшылар ауруханасында еңбек еткен. Ағасы Қанат та 40 жыл машинист болып жұмыс істеді. Ал Мараттың өзі Атбасар жол дистанциясына 2003 жылы 2-разрядты жол монтері болып жұмысын бастапты. Алты айдан кейін ақаутапқыш арбасының операторы болып ауысады, сосын аға оператор болды. Сонымен қатар инженер-құрылысшы мамандығы бойынша сырттай жоғары білім алды. 2007 жылы дистанцияның жол шебері болып тағайындалып, бірнеше жыл еңбек етті. Сосын үйренген жұмысы ақаутапқыш арбалардың аға операторы болып тағы бірнеше жыл жұмыс істеді. Ал 2011 жылы Еңбек қорғау жөніндегі инженер болып тағайындалып, дистанция өміріне белсене араласып, бұл бағытта көп жұмыс атқарды.  

– Сол жылдары бірінші кезектегі міндет ауыр және зиянды еңбек жағдайында жол монтері болып еңбек ететін әйелдерді сол қиын жұмыстан босату болды. Еңбек қорғау жөніндегі нормативтік-техникалық құжаттамалар мен нұсқаулықтарды талапқа сай реттеуге кірістік. Мекемедегі жұмысшылардың аттестаттациясын сәйкестендіру бойынша үлкен жұмыс жүргізілді. Бүгінгі таңда Атбасар жол дистанциясында 7 жылдан бері жарақатсыз жұмыс істеп келеміз. Қызметкерлердің штат саны – 612 адам. Дистанция шекарасы Есіл – Астана учаскесі. Бүгінде TARGET ZIRO «Өндірістік қауіпсіздіктің интеграцияланған жүйесі» жобасын іске асыру бойынша жұмыстар жүргізілуде. Басты мақсат – өндірісте нөлдік жарақат деңгейіне жету. Менің инженер ретіндегі басты қаруым да, ұстанымым да – қауіпсіздік, – дейді кейіпкеріміз.