Атакәсіпке адалдық: машинист Ерлан Бегимов туралы бір үзік сыр

Ерлан Бегимов – Түркістан локомотив пайдалану депосының машинист-нұсқаушысы. Теміржолшылар әулетінен шыққан оның бұл салаға келуі кездейсоқ емес. Атасының темірдей тәртіп пен жауапкершілікті ту еткен саланың қызығы мен шыжығы жайлы әңгімесі бала қиялына қанат бітіріп, болашағын айқындап берген еді.

Ерланның бойындағы табандылық қаннан келген бе дерсің?! Өйткені оның атасы Файзулла 39 жыл машинист болған екен. Әкесі Құрбанәлі де осы саладағы 42 жыл еңбек өтілінің 38 жылында машинист болыпты.  

2006 жылы Арыс теміржол колледжін бітіріп, Түркістан локомотив пайдалану депосына машинист көмекшісі болып қабылданған күннен бері Ерлан Құрбанәліұлы осы салада аянбай еңбек етіп келеді. Алғашқы жылдары оңай болмағанымен, аға буын әріптестерінің қолдауы мен бағыт-бағдары, үздіксіз ізденісі мен жаңашылдыққа деген құлшынысы оны кәсіби тұрғыда шыңдай түсті.  

Бүгінде міне аттай 19 жыл Ерлан атакәсіпке адалдық танытып келеді. Оның інісі Бағлан да 17 жылдан бері Түркістан депосында машинист. Ағайынды жігіттер әулет дәстүрін абыроймен жалғастырып келе жатқандарын мақтан тұтады.  

Ерлан Құрбанәліұлы осы жылдар аралығында мол тәжірибе жинап, ысылды. Машинист, машинист-нұсқаушы, депо кезекшісі, жылу жөніндегі инженер-техник, шұғыл техникалық басқару орталығының басшысы сынды қызметтерді атқарды. 2019 жылы ҚТЖ-ның «100 жас есім» бағдарламасы аясында өткен байқаудың бірінші легі бойынша жеңімпаз атанды. Ал 2022 жылы «Ысырапсыз өндіріс» байқауында үздік деп танылды. Көп ұзамай «Даму мектебінде» корпоративті блогер ретінде мойындалып, 2023 жылдан бастап ҚТЖ-ның ішкі тренері болып танылды. Осылайша, үздіксіз ізденіс пен тынымсыз еңбектің нәтижесінде кейіпкеріміз түрлі құрмет-қошеметке бөленіп, әрқилы марапатқа ие болған.  

Ерланның түсінігінде жетістік – тек қызметтік өсу ғана емес, кейінгі буын жас мамандарға жол көрсету, бағытбағдар беру деп санайды.