Еңбек елеусіз қалмайды
"Қазақстан теміржолшысы" газетінің Жамбыл облысындағы меншікті тілшісі
Конституцияның 30 жылдығына орай Жамбыл өңірінде салтанатты жиын өтті. Онда «ҚТЖ-Жүк тасымалы» ЖШС «Жамбыл ЖТ бөлімшесі» филиалы Талас станциясының пойыз құрастырушысы Марат Нұрикеевке «ІІІ дәрежелі Еңбек даңқы» ордені табысталды.
Мерекелік іс-шарада Жамбыл облысының әкімі Ербол Қарашөкеев өңірдің дамуына үлес қосып жүрген түрлі сала өкілдеріне, оның ішінде қарапайым еңбек адамдарына мемлекеттік наградалар тапсырды.
– Биыл Жұмысшы мамандықтар жылына орай еңбек адамдарына көп көңіл бөлінуде. Қарапайым кәсіп иелерінің мерейі артып жатыр. Олардың арасында теміржолшылардың бары қуантады. Теміржол саласы – тұрақты табыстың көзі. Еткен еңбек елеусіз қалмайды, – дейді Марат Нұрикеев.
Пойыз құрастырушының сөзі негізсіз емес екен. 1991 жылы Тараз теміржол көлік және коммуникация колледжін бітірген соң, Талас станциясында орталық сигнал бұғаттаушысы болып жұмысқа орналасқан жас маман екі-үш жылдан кейін басқа салаға ауысады.
Тоқсаныншы жылдардағы тоқырау кезеңдегі көпке таныс жағдай ғой. Араға біраз жыл салып, 2011 жылы әулетіне кәсіп болған теміржол саласына қайта оралыпты. Содан бері Талас станциясында пойыз құрастырушы.
– Біз – теміржолшы әулетіміз. Атам да, әкем де, анам да Талас станциясында еңбек еткен. Әкем марқұм зейнетке шыққанша жол бригадирі болды. Анамның да сіңірген еңбегі бар, станцияда жүк қабылдап-өткізушінің қызметін атқарды. Қазір зейнеттік демалыста. Өзім де қайта айналып осында келдім. Алған марапатым – адал еңбектің өтеуі, – деп қуанышымен бөлісті марапат иесі.