ҚТЖ қызметкерлері байқауда топ жарды
Абай облысы бойынша меншікті тілші
Жуырда Семей қаласында ел шығысы бойынша Жұмысшы мамандықтары жылы аясындағы «Еңбек жолы» атты республикалық байқаудың облыстық кезеңінің жеңімпаздары салтанатты түрде марапатталды. Озаттар қатарында үздік еңбек әулеті, жас жұмысшылардың тәлімгерлері, жұмысшы мамандық иелері бар.
Әрине, жұмысшы мамандықтарының арасында жергілікті теміржолшылар қауымының шоқтығы биік болды. Марапаттау рәсімі «Еңбекші жастар» фестивалі аясында өткен болатын. Осы орайда күллі Абай елі бойынша «Үздік еңбек әулеті» номинациясының жеңімпазы болып аягөздік теміржолшылар династиясы – Әділхановтар әулеті танылды. Жалпы әулеттің теміржол саласындағы еңбек өтілі 233 жылдан асады. Мәселен, Қазбек Әділханов әкесі Идрис Әділхановтың еңбек дәстүрін жалғастырып, 1980 жылдан бері Аягөз вагон жөндеу депосында жұмыс істейді. Бүгінде ол техникалық бақылау бөлімінің бастығы болып еңбек етеді.
Бір бұл емес, еңбегімен еленген теміржолшы жастар арасында Семей ЖТ бөлімшесі Жастар ұйымының төрайымы Арайлым Қосанова да жеңімпаз атанды. Арайлым бастаған теміржолшы жастар бөлімше басшылығының қолдауымен желі бойында түрлі әлеуметтік жобалар мен акциялар ұйымдастырып, қайырымдылық шараларын өткізіп жүргені белгілі.
Қоғамдық жұмыстарда да белсенділік танытып жүретін Арайлым биылғы жылы ұлттық компания бойынша өткізілген «ҚТЖ 100 есім» байқауының жеңімпазы атанды. Сондай-ақ, үздік қызметкер ретінде де бірнеше мәрте марапаттар мен алғыс хаттарға ие болған. Бұл жолы ол Абай облысы бойынша «Үздік еңбекші жас» номинациясын замандастары арасында айқын басымдықпен жеңіп алды.
– Жалпы, жұмысшы мамандықтары жылы аясында адал әрі қажырлы еңбегімен еліміздің өсіп-өркендеуіне үлес қосып жатқан сан алуан кәсіп иелеріне, оның ішінде теміржолшылар қауымына да үлкен сый-құрмет көрсетіліп жатыр. Бұл ретте семейлік сала қызметкерлері, әсіресе жастар қауымы да кәсіби шеберліктерін шыңдап, өндірісте жоғары көрсеткішке қол жеткізуге ұмтыла бермек. Президентіміз айтып өткендей, Қуатты әрі Әділетті Қазақстанның мызғымас негізін қалау үшін еңбек адамының қосар үлесі ерекше болмақ, – дейді Арайлым.
Сөз жоқ жұмысшы мамандықтары үлкен мәртебеге ие болып жатқан қазіргі уақытта Абай еліндегі теміржолшылар қауымы да мұндай құрметке әбден лайық.