«Жыл машинисі» анықталды

Жұмысшы мамандықтары жылы аясында және 25 қазан – Республика күні мерекесіне орай Семей ЖТ бөлімшесіне қарасты Семей локомотив пайдалану депосында «Жыл машинисі» үздіктер байқауы ұйымдастырылды.  

Басты ерекшелік сол, байқаудың талаптары өте қатаң болды. Атап айтсақ, тепловоз машинисі қызметінде ең кемі бір жылдан кем емес еңбек өтілі бар әрі осы уақыт аралығында бірде-бір рет маневрлік жұмыс барысында ақаулықтарға жол бермеген үлгілі теміржолшылар ғана қатысуға мүмкіндік алды. Бұл орайда арнайы құрылған комиссия мүшелерінің ұзақ уақыт талқылауынан соң Семей ТЧЭ-24 мекемесінен бес, ТД-18 Дегелең айналым депосынан бір тепловоз машинисі байқауда бақ сынауда жолдама ала алды.  

Ал байқау басталған күні барынша даярлықпен келген машинистер  қатаң талапқа негізделген сыннан өтті. Депо басшысының орынбасары Жанат Ахметовтің алғысөзі мен құттықтау лебізінен соң бәйгеге  түскелі отырған машинистерге тест сұрақтары ұсынылды. Десек те, ең күрделі тапсырмалар парактикалық жұмыс кезінде берілді. Байқауға қатысушылар комиссия мүшелерінің тепловоз конструкциясының бөлшектері бойынша қойылған сауалдарына жауап беріп, оны көрсетіп берді. Сондай-ақ автотежегішті меңгеру бойынша білім-білік деңгейлерін де сынға салып, әсіресе пойыз қозғалысының қауіпсіздігін сақтау мен стандартты емес жағдайларда әрекет ету жайлы сұрақтарға жауап қайырды.

Жалпы, байқау барысында машинистер қауымы еңбекті қорғау нұсқаушысы, аға машинист-нұсқаушы және цех комитеті төрағасының да сынақтарынан өтті.

Айта кетерлігі, комиссия құрамындағы жеті адам байқау қатысушыларына арнайы балл бойынша бағалар белгілеген болатын. Осылайша, жиналған ұпай санын есептеп, қорытындылай келе, Семей локомотив пайдалану депосы бойынша «Жыл машинисі» байқауының жеңімпазы болып тепловоз тізгіндеген Ерлан Дюсенбинов лайық деп танылды. Жұлдызы жанған жеңімпазға депоның кәсіподақ ұйымының демеушілігімен 30 мың теңге сыйлық тарту етілді. Сондай-ақ екінші және үшінші орын алған машинстерге де кәсіподақ тарапынан арнайы тарту-таралғылар жасалды.

Байқау комиссиясының мүшесі Серік Дүйсенбаевтың айтуынша, бұл сын мекеме ішіндегі іріктеу кезеңі. Жеңімпаз атанған үздік үштікті алдағы уақыттарда бұдан да үлкен бәсекелер күтіп тұр. Яғни бұл  сайыс жергілікті локомотив шаруашылығының майталмандарын   ынталандырып, кәсіби тұрғыдан шыңдап, жаңа биік-белестерге жетелей түседі деген сөз.